ग्रामथानमा एमालेको चुनाव लक्षित प्रशिक्षण

विराटनगर । नेकपा एमाले मोरङले ग्रामथान गाउँपालिकामा मंसिर १६ गते हुन लागेको उपनिर्वाचन लक्षित प्रशिक्षण गरेको छ । पार्टी महासचिव शंकर पोखरेलको उपस्थितिमा चुनावी प्रशिक्षण गरिएको एमालेले जनाएको छ ।

महासचिव पोखरेलले मंसिर १६ गते हुने उपनिर्वाचनबाट पार्टीले अघि बढाएको मिसन ८४ को आधार तय हुने बताए । त्यसका लागि उपनिर्वाचनलाई पार्टीले ठूलो अवसरका रुपमा हेरेको बताए ।

‘जिम्मेवारीका साथ पार्टीका नेता कार्यकर्ताहरुले काम गर्नुपर्नेछ, मुलुककै भविष्य तय गर्न यो चुनावलाई लिनुपर्छ’ उनले भने, ‘सबै नेता कार्यकर्ताले चुनावी अभियानलाई आफ्नो कर्तव्यका रुपमा राखेर काम गरौं ।’

उनले ग्रामथान गाउँपालिकामा अघिल्लो निर्वाचनमा पार्टी नेता कार्यकर्ताहरूकै भूमिकाले परिणाम दुर्घटना परेको टिप्पणी गरे । 

‘पाँचवटा वडा र उपाध्यक्ष जितेर अध्यक्ष हारेको रहेछ’ महासचिव पोखरेलले भने, ‘अघिल्लो पटकमा यहाँको निर्वाचनमा हामीलाई दुर्घटना भएको जस्तो देखिन्छ, यसलाई सच्याएर सवैले काम गर्नुपर्दछ ।’

उनले एमालेलाई बलियो बनाउन पार्टी अध्यक्ष केपी ओलीदेखि सवैभन्दा तलको कमिटीको  कार्यकर्ताको पनि समान जिम्मेवारी हुने बताए ।

एमालेले नाकाबन्दीको समयमा डटेर सामना गरेको, अनेकौं प्रहारका वावजुदपनि इलामको उपनिर्वाचनबाट एमाले नै बलियो रहेको पुष्टि गरेको र मुलुकको महत्वपूर्ण पूर्वाधार विकासको सोच अघि बढाउने पार्टी पनि एमाले नै भएको उनले बताए । चुनाव जितेर समाजलाई बदल्न एमालेको जित आवश्यक रहेको महासचिव पोखरेलले बताए ।

प्रशिक्षण कार्यक्रमलाई एमालेका स्थायी कमिटी सदस्य एवं कोशी प्रदेश इन्चार्ज शेरधन राईले पार्टी निर्णय विपरित गतिविधि गर्ने जोसुकैलाई पनि यसपटक त्यतिकै नछाडिने चेतावनी दिए । उनले चुनावभन्दा अन्य बिषयमा केन्द्रित नहुन कार्यकर्ताहरूलाई निर्देशन दिए ।

एमाले मोरङका अध्यक्ष बाबुराम कार्कीको अध्यक्षतामा भएको प्रशिक्षण कार्यक्रमलाई मुख्यमन्त्री हिक्मतकुमार कार्की, केन्द्रीय सदस्य एवं मोरङ जिल्ला इन्चार्ज जीवन घिमिरे, केन्द्रीय सदस्य भगवती चौधरी, कोशी प्रदेश कमिटी अध्यक्ष घनश्याम खतिवडा लगायतले सम्बोधन गरेका थिए ।

एमाले मोरङले ग्रामथान गाउँपालिकाको उपनिर्वाचनका लागि तुलसीराम विश्वासलाई अध्यक्षको उम्मेदवार बनाउने निर्णय गरिसकेको छ । बुधबार विहानदेखि एमालेले घरदैलो अभियान सुरु गर्ने जनाइएको छ ।