एक सय रुपैयाँले लिएको ज्यान, चार वर्षपछि पक्राउ परे तामाङ

संखुवासभा । एक सय रुपैयाँ दिएको सापटी फिर्ता माग्दा ज्यान गुमाएका एक ब्यक्तिका हत्यारा चार वर्षपछि पक्राउ परेका छन् । संखुवासभाको मादी नगरपालिकामा २०७७ सालमा सय रुपैयाँले ज्यान लिएको थियो ।

स्थानीय भेडीचोकस्थित धोरोरे धारामा ५२ वर्षीय रत्नबहादुर प्रधानको शव चार वर्षअघि माघ १७ गते फेला परेको थियो ।

निधारमा चोट लागेको अवस्थामा फेला परेको शव कानुनी प्रक्रिया पूरा गरी परिवारजनले शदगद गरेका थिए । उनका हत्यारा २७ वर्षीय राजकुमार तामाङलाई अहिले पक्राउ गरिएको प्रहरीले बताएको छ ।

गत असोज १९ गते एउटा टहरोमा आगजनी भएको थियो । त्यसमा संलग्न ब्यक्ति मादी–८ कै तामाङ र २८ वर्षीय दिनेश मोक्तान पक्राउ परेका थिए । दुबैलाई आपराधिक उपद्रव मुद्दामा प्रहरीले कारवाही अगाडि बढाएको थियो । 

अनुसन्धानकै क्रममा तामाङले मदिरा सेवन गरेका बेला प्रधानको हत्या गरेर पनि आपूm जोगिएर हिंडेको बताउने गरेका थिए ।

सो सूचनाका आधारमा छानविन गर्दा तामाङले घटना स्वीकार गरेपछि आगजनीको मुद्दासँगै कर्तब्य ज्यानको मुद्दा थपिएको छ । 

संखुवासभाका प्रहरी नायव उपरीक्षक दक्षकुमार बस्नेतका अनुसार प्रधानबाट लिएको एक सय रुपैयाँ फिर्ता नगरेपछि दुई बीच बिवाद भएको थियो । 

धाराको डिलमा उभिएका प्रधानलाई तामाङले पछाडीबाट लात्तीले हानेर तल धारामा झारेका थिए ।

ढुङ्गामा टाउको बजारिएपछि उनको घटनास्थलमै मृत्यु भएको थियो । घटनापछि तामाङ धर्मदेवी गाउँपालिका–१ स्थित ससुराली घरमा बस्दै आएका थिए । 

आगजनीको घटना भएपछि पक्राउ परेका उनीहरुबाट पुरानो हत्याको सुराक मिलेको प्रहरीको भनाई छ । दुबैलाई जिल्ला अदालतबाट म्याद थप गरी हिरासतमा राखेर थप अनुसन्धान भई रहेको बस्नेतले बताए ।