शिशु सेवाद्वारा चार पुरस्कृत

विराटनगर । शिशुसेवा समिति विराटनगरले एक समारोबीच शनिबार चार  जनालाई पुरस्कृत गरेको छ ।  सम्मानित हुनेहरुमा साहित्यकार यशु श्रेष्ठ (काठमाडौं), बाल प्रतिभा श्रीनभ ढुंगेल, पत्रकार शम्भु पोखरेल र संगीतकर्मी महिमा पाण्डे छन् ।

सो कार्यक्रममा संस्थाले प्रत्येक २ वर्षमा प्रदान गर्दै आएको बाल साहित्य पुरस्कार काठमाडौं निवासी बाल साहित्यकार श्रेष्ठलाई प्रदान गरेको हो ।

यसैगरी संस्थापक अध्यक्ष शान्ता पोखरेलको नाममा स्थापना भएको ‘शान्ता राष्ट्रिय बाल उत्कृष्ट पुरस्कार’ विराटनगर–१ निवासी ६ वर्षीय बाल प्रतिभा ढुङ्गेल, ‘शिशु सेवा समिति पत्रकारिता पुरस्कार’ कान्तिपुर टेलिभिजनका फोटो पत्रकार  पोखरेल र तीर्थप्रसाद स्मृति रानु संगीत पुरस्कार स्वर संगम संगितालयकी संगीत प्रशिक्षक पाण्डेलाई   प्रदान गरिएको हो । 

पुरस्कृत सबैलाई जनही रू ११ हजार १ सय ११ सहित सम्मानपत्रबाट सम्मान गरिएको  थियो ।

वरिष्ठ समाजसेवी दिनबन्धु गोयलको प्रमुख आतिथ्यता भएको समारोहमा समाजसेवी गोयल, संस्थाका अध्यक्ष कविराज न्यौपाने, चेतना संरक्षण प्रतिष्ठान नेपालकी अध्यक्ष गंगा सुवेदीले पुरस्कृत व्यक्तित्वलाई सम्मानित गरेका थिए ।