प्राध्यापकहरु नेताको घर धाउँदा क्याम्पस कमजोर

विराटनगर । मोरङ क्याम्पसका पूर्व प्रमुख गोपाल कार्कीले प्राध्यापकहरुले राजनीतिक दलका नेताहरुको घर–घर र ढोका–ढोकामा धाउनाले क्याम्पस मात्र होइन विश्वविद्यालय नै कमजोर भएको बताएका छन् ।

मोरङ क्याम्पसको ७० औं वार्षिकोत्सवको अवसरमा बुधबार भएको कार्यक्रममा  कार्कीले यस्तो धाउने कार्यले नेताहरुले प्राध्यापकहरुको अनुरोध सुन्न र मान्न छाडेको उनले बताउँदै यस्तो कार्य रोकेमा शैक्षिक संस्था सुधार हुने स्पष्ट पारे ।

सो अवसरमा पूर्व क्याम्पस प्रमुख डा बाबुराम तिमल्सेनाले आफू प्रमुख भएको बेला कुनै राजनीतिक नेताको कुरा सुन्ने भन्दा पनि निजी स्वार्थभन्दा पर बसेर क्याम्पसको हितको लागि आफूले कार्य गरेको दावी गरे । 

क्याम्पस प्रमुख डा रामावतार शरणले शैक्षिक तथा प्रशासनिक रुपले क्याम्पसलाई व्यवस्थित, चुस्त, दुरुस्त राख्न प्रयास गरिरहेको बताए । क्याम्पसमा एक हप्तादेखि चलिरहेको आंशिक प्राध्यापकहरु करारको माग गर्दै धर्नामा बसेको सन्दर्भलाई जोड्दै प्रमुख डा शरणले आंशिक प्राध्यापकको व्यवस्थापनका लागि आफूले प्रयास गर्ने बताए ।

सो अवसरमा सहायक क्याम्पस प्रमुख उमेश यादव, प्रा महेन्द्रनारायण यादव, डा अच्युतराज कट्टेल,प्रमोद कामत लगायतले मोरङ क्याम्पस पूर्वको धरोहर भएकोले यसले आफ्नो गौरवलाई जोगाउँदै उचाईमा पुर्‍याउनु पर्नेमा जोड दिए ।

कार्यक्रममा उत्कृष्ट प्राध्यापकको रुपमा प्राडा नागेन्द्र साह र रामकुमार थापा एवम् उत्कृष्ट कर्मचारीमा अनिल कामतलाई चाँदीको पदकसहित सम्मान गरिएको थियो ।