तेस्रो खेलपनि हारेपछि बाहिरियो कोशी

विराटनगर । विराटनगरको बैजनाथपुर क्रिकेट रंगशालामा जारी कोशी प्रदेश ट्रफी पेप्सी टी–२० राष्ट्रिय क्रिकेट प्रतियोगितामा तेस्रो खेलमा पनि पराजित भएपछि आयोजक कोशी प्रदेश प्रतियोगिताबाटै बाहिरिएको छ । कोशीका विरुद्ध त्रिभुवन क्लवको आर्मीले जित दर्ता गर्दै सेमिफाइनल प्रवेश गरेको छ ।

मंगलबारको पहिलो खेलमा विभागीय टोली आर्मीले कोशी प्रदेशलाई ५ विकेटले पराजित गरेको हो । समुह ए मा ४ खेल खेलेको कोशीले कर्णालीविरुद्धको पहिलो खेल मात्रै जितेको थियो । त्यसपछिका लगातार ३ खेलमा पराजित भएको हो । आर्मीले लगातार ३ खेलमा जित हात पार्दै सेमिफाइनलमा प्रवेश गरेको छ । आर्मी ६ अंकसहित शीर्ष स्थानमा उक्लिएको छ । 

टस हारेर ब्याटिङ गरेको कोशीले निर्धारित २० ओभरमा ६ विकेट गुमाउँदै १३५ रनको योगफल तयार पारेको थियो । कोशीका लागि दिपेश कँडेलले ३६ बलमा २ छक्का र २ चौका प्रहार गरि अविजिचत ४० रन बनाउँदा श्रवण यादवले १४ बलमा ५ चौका प्रहार गदै २९ रन जोडेका थिए । 

१५ ओभरभित्र ६ विकेट गुमाएर ८९ रन बनाएको कोशीका लागि कँडेल र यादवले २६ बलमा ४६ रनको अविजित पारी खेले । त्यस्तै अनिल लामिछानेले २१ रन र सुजन थपलियाले १४ रनको योगदान दिए । आर्मीका त्रितराज दास र पवन कार्कीले समान २–२ विकेट लिएका थिए ।

१३६ रनको लक्ष्य पछ्याएको आर्मीले १८ दशमलव ४ बलमा ५ विकेट गुमाउँदै लक्ष्य भेट्टाएको हो । आर्मीकोे जितमा प्लेयर अफ द म्याच त्रितराज दासले ३२ बलमा २ छक्का र ४ चौका प्रहार गरी ३५ रन जोड्दा सन्तोष कार्कीले टिमका लागि २४ रनको योगदान गरे । कोशीका श्रवण यादव र ज्ञानेन्द्र श्रेष्ठले २–२ विकेट लिएका थिए ।

समुह ए बाट आर्मीले अब बुधबार एपिएफसँग लिग चरणको अन्तिम खेल खेल्ने छ । सवै ४ खेलेको कर्णाली २ खेलमा जित र २ मा हारको सामना गर्दै ४ अंकसहित दोस्रो स्थानमा छ । 

समुह बी अन्तरगत प्रतियोगिताबाट बाहिरिसकेको वागमती प्रदेशले मंगलबारको खेलमा गण्डकी प्रदेशलाई ४ विकेटले पराजित गर्दै सान्त्वना जित दर्ता गरेको छ । 

टस जितेर ब्याटिङ गरेको गण्डकीले निर्धारित २० ओभरमा ८ विकेट गुमाई १५० रन बनाएको थियो । गण्डकीका लागि ४७ बलमा १ छक्का र ९ चौका प्रहार गरि ६२ रन बनाउँदा अविषेक थापाले २३ रनको योगदान दिए । वागमतीका इसान पाण्डेले २ विकेट लिँदा रामनरेश गिरी, दिपेश श्रेष्ठ र तिलक भण्डारीले समान १–१ विकेट लिएका हुन् ।

१५१ रनको लक्ष्य पाएको वागमतीले १९ दशमलव २ बलमा ६ विकेट गुमाई  लक्ष्य पार गरेको थियो । वागमतीको जितमा प्लेयर अफ द म्याच घोषित रामनेश गिरी २७ बलमा ३ छक्का र ४ चौका प्रहार अविजित ५० रनको पारी खेले । रविन जोशीले पनि अविजित ३२ रन बनाए । आशुतोष घिरैयाले २९ रनको योगदान दिए । गण्डकीका सुवास भण्डारीले ३ विकेट लिँदा सन्दिप पराजुली र अविशेक थापाले १–१ विकेट लिएका थिए ।

३ खेलमा २ मा पराजित भइसकेको वागमती तेस्रो स्थानमा उक्लिएपनि लिग चरणको अन्तिम खेल्नु अघि नै बाहिरिएको हो । गण्डकीले भने प्रतियोगिताको लिग चरणका कुनैपनि खेल नजिति अंक विहिन भएर घर फर्किएको छ ।

बुधबारको पहिलो खेल पुलिस र लुम्बिनी तथा दोस्रो खेल दुई विभागीय टोली आर्मी र एपिएफबिच हुने मोरङ क्रिकेट संघका अध्यक्ष मोहमद साद कुरैसीले जानकारी दिए ।