सरकारमा जाने नजाने बिषयले कोशीमा कोइराला पक्षभित्र विवाद

विराटनगर । कोशीका सत्तारुढ दुई दल कांग्रेस र एमालेले सरकारको साझा कार्यक्रम तय गर्न कार्यदल  गठन गरिसक्दा पनि कोशीमा कांग्रेसको कोइराला पक्ष भने सरकारमा सहभागी भएको छैन । 

स्रोतका अनुसार न्यूनतम दुईवटा मन्त्रालय नपाएसम्म सरकारमा नजाने अडानमा रहेको कोइराला पक्षले अहिलेसम्म मन्त्री पठाउने सुरसार गरेकै छैन । 

‘उहाँहरुले.पाउने एउटा मन्त्रालय हो, दुईटा पाउनैपर्ने त्यो पक्षको अडान छ’, कांग्रेस संस्थापन पक्षका एक नेताले भने ‘अहिले त्यो सम्भव देखिन्न । किनभने मन्त्रालय थप्ने तयारी तत्काल छैन ।’

संस्थापन पक्षका नेताहरुका अनुसार मन्त्रीको नाम दिन ढिला हुँदा कोशीको कोइराला पक्षभित्रै विवाद बढेको छ । 

‘हामीले सुने अनुसार कोइराला पक्षभित्र कोही सरकारमा जानुपर्ने अडानमा छन् रे, कोही जानुहुन्न भन्ने पक्षमा छन् भन्ने सुनिएको छ’, ती नेताले भने ‘सबैले शेखर कोइरालाको अन्तिम निर्देशन कुरिरहेको भन्ने बुझिएको छ ।’ 

कांग्रेस नेताहरुका अनुसार कोइराला पक्षका चार जना सांसदहरु वर्तमान सरकारमा मन्त्री बन्ने दौडमा सबैभन्दा धेरै सहभागी छन् । 

यसअघि विद्रोह गरेर केदार कार्कीलाई मुख्यमन्त्री बनाउन भूमिका निर्वाह गरेकामध्ये इलामका गोविन्द गिरी र मोरङका मानबहादुर लिम्बू मन्त्री हुने लाइनमा छन् ।

यसअघि नै मन्त्री भइसकेका उदयपुरका रामकुमार खत्री र धनकुटाकी इन्दिरा थापा पनि मन्त्री नभइ नछाड्ने दौडमा छन् । 

अहिले भागमा परेको जम्मा एउटा मन्त्रालयमा धेरै आकांक्षी भएपछि कोइराला पक्षलाई सकस परेको छ । यसरी सकस चुलिँदा पूर्व मुख्यमन्त्री केदार कार्की भने अहिलेको सरकारमा सहभागी हुन नहुने अडानमा रहेको स्रोतको भनाइ छ ।

‘पूर्व मुख्यमन्त्री कार्की सरकारमा जान नहुने अडानमा रहेको बुझिएको छ’, स्रोतले भन्यो ‘अरु धेरै सांसद भने सरकारमा जानुपर्ने अडानमा छन् । यो विषय छिनोफानो हुने बित्तिकै कोइराला पक्ष सरकारमा सामेल हुनेछ ।’