शिक्षादीपमा ८० प्रतिशत अंक कटाउने विद्यार्थीहरु सम्मानित

विराटनगर : विराटनगरको शिक्षादीप कलेजले विज्ञान संकायतर्फ कक्षा ११ र १२ मा ८० प्रतिशतमाथि अंक ल्याउने विद्यार्थीहरुलाई एक समारोहका बिच सम्मानित गरेको छ । कलेजले मंगलबार कक्षा ११ का ४४ जना र कक्षा १२ का ४७ जना विद्यार्थीहरुलाई सम्मानित गरेको हो ।

कक्षा ११ र १२ को प्रथम आवधिक परीक्षामा सर्वोत्कृष्ट अंक ल्याउने २२ जनासहित ९१ जनालाई सम्मानित गरिएको कलेजका प्रिन्सिपल ज्ञानबहादुर खड्काले बताए ।

कलेजले प्रत्येक आवधिक परीक्षामा ८० प्रतिशत अंक कटाएर उत्कृष्ट हुने विद्यार्थीहरुलाई सम्मान गर्दै छात्रबृत्ति समेत प्रदान गरिंदै आएको जानकारी दिए । प्रिन्सिपल खड्काले उत्कृष्टदेखि सर्वोत्कृष्ट अंक ल्याउने कक्षा ११ र १२ का  विद्यार्थीहरुलाई २२ हजार ७५० रुपैयाँदेखि ४२ हजार ७५० रुपैयाँसम्म छात्रबृत्ति प्रदान गरिएको बताए ।

कक्षा ११ तर्फको फर्स्ट टर्मिनल परीक्षामा सर्वोत्कृष्ट अंक ल्याएर प्रथम हुने रूसन दाहाल, द्धितीय अमन साह र तृतीय स्थानमा गौरव भट्टराई रहेका छन् । त्यसैगरी कक्षा १२ मा प्रशान्त कार्की प्रथम, गंगाराज अधिकारी द्वितीय र कृपा शिवाकोटी तृतीय भएका थिए । 

८० प्रतिशतभन्दा बढी अंक ल्याउने अन्य विद्यार्थीहरुलाई भने २२ हजार ७५० रुपैयाँ बराबरको छात्रबृत्ति प्रदान गरिएको जनाइएको छ । विद्यार्थीहरुलाई कलेजका प्रिन्सिपल खड्कासहित चिफ डाइरेक्टर रमेश कुमार मण्डल, निर्देशक भुपेन्द्र दाहाल र विज्ञान संयोजक नविन कुमार रोयले माला र टिका लगाइदिएर सम्मानित गरेका थिए ।