रामलाल गोल्छामा ६५ हजारभन्दा बढी बिरामीको उपचार

विराटनगर । रामलाल गोल्छा आँखा अस्पताल विराटनगरले गएको एक आर्थिक वर्षमा ६५ हजार बिरामीलाई उपचार सेवा प्रदान गरेको जनाएको छ ।

यसमध्ये आधाभन्दा बढी बिरामीको निःशुल्क उपचार गरिएको अस्पतालका व्यवस्थापक नवीन राजवंशीले जानकारी दिएका छन् । 

अस्पतालको बुधबार सम्पन्न सातौं वार्षिक साधारणसभामा उनले विभिन्न शिविरहरूमार्फत झण्डै २५ हजारको आँखा जाँच गरिएको पनि बताए ।

अस्पतालका पुराना चिकित्सक डा. यादवभक्त जोशीको प्रमुख आतिथ्यतामा भएको साधारणसभामा विभिन्न व्यक्तिहरूले शुभकामना दिएका थिए । 

शुभकामना दिनेहरूमा समाजसेवी बेनीगोपाल मुण्दडा, नेपाल नेत्रज्योति संघका विजयहरि शर्मा, डा.मोहनचन्द्र घिमिरे, डा. भाष्कर झा, खेम नेपाली, विन्देश्वर महतो, सुरेन्द्र गोल्छा, अधिवक्ता राजकुमार राउतलगायतका थिए । 

साधारणसभाको उद्घाटन प्रतिष्ठानका कार्यवाहक अध्यक्ष दिनेश गोल्छाको सभापतित्वमा सम्पन्न भएको थियो ।