विराट म्यूजिक फेस्टिभलको टिकट ‘आइएमई पे’ बाटै

विराटनगर । कात्तिक १० गते विराटनगरको जैन भवनको प्राङ्गणमा हुन लागेको तेस्रो संस्करणको विराट म्यूजिक फेस्टिभलको टिकट बुकिङको व्यवस्था पहिलोपटक अनलाइन माध्यमबाट गरिएको छ ।

उत्साहपूर्ण रूपमा अनलाइन टिकट बुकिङ भइरहेको म्यूजिक फेस्टिभलका संयोजक सन्तोष महत (स्यान्ट्रो) ले बताए ।

‘विराटनगरमै पहिलोपटक हामीले आइएमई पेको माध्यमबाट अनलाइनबाटै टिकट खरिद गर्न सकिने व्यवस्था गरेका छौं’ महतले भने, ‘जसका कारण अनलाइन टिकट बिक्री उत्साहपूर्ण रूपमा भइरहेको छ, घरैमा बसिबसी टिकट लिन सकिनेछ ।’

सोचे अनुसार नै अनलाइन माध्यमबाट टिकट बिक्री भइरहेको उनले जानकारी दिए । म्यूजिक फेस्टिभलको दिन जैन भवनबाट पनि टिकट लिन सकिने तर त्यतिबेला प्रति टिकट मूल्य ३०० रूपैयाँ पर्ने उनले बताए । आइएमई पेबाट टिकट खरिद गर्दा भने प्रति टिकट २०० रूपैयाँ मात्रै पर्ने जनाइएको छ ।

त्यसका साथै विराटनगरको रेडमग कफी रेन्बो गल्ली, चिया स्टेशन एयरपोर्ट लाइन, ह्याप्पी आवर हेभन पिपल चोक, मोजो क्याफे ट्राफिक चोक, मनकामना प्रोडक्सन हाउस बरगाछी, हाइकभिजन मल्टिप्लेक्स इन्फो सिस्टम मेनरोड र चिया द टि सप मात्रिका गल्लीबाट समेत टिकट प्राप्त गर्न सकिने जनाइएको छ ।

विराटनगरमा एक्स्पो र मेला महोत्सवमा मात्रै सांगीतिक कन्सर्ट हुने गरेकोमा विराट म्यूजिक फेस्टिभलले अलग पहिचान बनाउँदै लगेको आयोजक समितिका अमित राजभण्डारीले बताए । उनले जैन भवनको करिब चार हजार मानिस अटाउन सक्ने प्राङ्गणमा म्यूजिक फेस्टिभल आयोजनाका लागि भव्य रूपमा तयारी भइरहेको बताए ।

फेस्टिभलका लागि विराटनगरसहित इटहरी, झापा, धरानलगायतका प्रमुख स्थानबाट समेत अनलाइन टिकट बुकिङ भइरहेको जनाइएको छ । उक्त म्यूजिक फेस्टिभलमा अत्याधुनिक साउण्ड र लाइटको व्यवस्था गरिएको राजभण्डारीले बताए । साथै फुड स्टल पनि रहने जनाइएको छ ।

म्यूजिक फेस्टिभलमा चर्चित गायक तथा ब्याण्ड ‘स्वप्न सुमन एण्ड दि एस्ट्रेस’ र ‘पूर्ण राई एण्ड दाजुभाइहरू’ को मुख्य प्रस्तुति रहने जनाइएको छ । त्यस्तै विराटनगरका ख्यातिप्राप्त संगीतकर्मीहरूले समेत गीत तथा नृत्य प्रस्तुत गर्ने जनाइएको छ ।

म्यूजिक फेस्टिभलको मुख्य प्रवद्र्धन विराटनगर महानगरपालिकाले गरेको छ । म्याजिक फुटवेयरले फेस्टिभलको मुख्य प्रायोजन गरेको संयोजक महतले बताए ।