एलएलबीको इन्ट्रान्स दिइरहेका ५९ जनालाई कारबाही

विराटनगर । सप्तरीको राजविराजस्थित महेन्द्र विन्देश्वरी बहुमुखी क्याम्पसमा मंगलबार सञ्चालन भएको एलएलबी (ब्याचलर अफ लेजिस्लेटिभ ल) को प्रवेश परीक्षामा ५९ जना परीक्षार्थी  कारबाहीमा परेका छन् । 

क्याम्पस प्रमुख सुशील कर्णले दिएको जानकारी अनुसार काठमाडौंबाट खटिएर आएको विशेष टोलीले ती ५९ जना परीक्षार्थीलाई परीक्षा हलबाट निकालेको हो । उनीहरू सबैको इन्ट्रान्स (प्रवेश परीक्षा) रद्द भएको छ ।

महेन्द्र विन्देश्वरी बहुमुखी क्याम्पसमा कानुन संकायको स्नातक तहमा ३ सय जना विद्यार्थीका लागि मंगलबार प्रवेश परीक्षा लिइएको थियो । ३ सय जनाको सिटका लागि देशभरका ८७२ जना परीक्षार्थी सहभागी थिए । 

‘ती मध्ये कोही मोबाइल चलाइरहेको अवस्थामा, कोही अनियमित अवस्थामा फेला परेपछि काठमाडौंबाट आएको टोलीले कारबाही गरेको हो’ क्याम्पस प्रमुख कर्णले भने ‘संख्या चाहिं ५९ हो कि ६० हो यकिन छैन । यही हाराहारीमा हुनुपर्छ ।’

देशका विभिन्न भागबाट आएका विद्यार्थीहरू कारबाहीमा परेको उनले जानकारी दिए ।

क्याम्पस प्रमुख कर्णले दिएको जानकारी अनुसार प्रवेश परीक्षा १ घन्टा ४० मिनेटको थियो । 

बिहान ८ बजे परीक्षा सुरू भएको थियो । परीक्षा सुरू भएको केहीबेरमै उनीहरू निरीक्षण टोलीको फन्दामा परेका थिए । 

कानुन संकायको स्नातक पढ्न अहिले अर्को  कुनै विषयमा स्नातक गरेको हुनुपर्ने प्रावधान छ । 

राजविराजको यो क्याम्पस कानुन पढ्न चाहने विद्यार्थीका लागि आकर्षणको केन्द्र बन्दै आएको छ । 

यो क्याम्पसमा कानुनका साथै मानविकी, विज्ञान, वाणिज्यशास्त्र र शिक्षाशास्त्रको पनि पठनपाठन हुन्छ ।