एमाले मोरङको १० औं जिल्ला अधिवेशन : सुरु हुन सकेन बन्दसत्र

विराटनगर । नेकपा एमाले मोरङको १० औं जिल्ला अधिवेशनको बन्दसत्र सुरु हुन ढिलाई भएको छ । आइतबार विहान ८ बजेदेखि बन्दसत्र सुरु गर्ने भन्दै शनिबार साँझ प्रतिनिधिहरूलाई अधिवेशन स्थलबाट विदाई गरिएको थियो ।

तर अपरान्ह साढे ११ बजेसम्म पनि अधिवेशनको बन्दसत्र सुरु हुन सकेको छैन ।

बन्द सत्र अघि बढाउन अध्यक्ष मण्डलका अध्यक्ष तोकिएका एमाले केन्द्रीय सदस्य एवं मोरङ जिल्ला इन्चार्ज जीवन घिमिरेसहितका नेताहरू हलभित्र छन् । तर कतिपय प्रतिनिधिहरूले अझै पनि कार्ड प्राप्त नगरेका कारण बन्दसत्र संचालन गर्न ढिलाई भइरहेको जनाइएको छ ।

प्रतिनिधिहरूले अधिवेशनको व्यवस्थापन फितलो भएको भन्दै आलोचना गरेका छन् । विराटनगरको बरगाछीस्थित होटल मनास्लु इनमा एमाले मोरङको जिल्ला अधिवेशन जारी छ । 

कोशी राजमार्गबाट अधिवेशन स्थलमा प्रवेश गर्ने मुल गेटबाटै प्रतिनिधि र पार्टीका तोकिएका नेताहरू बाहेकलाई प्रवेश गर्न नपाउने अध्यक्ष मण्डलका सदस्य एवं प्रतिनिधि सभाका सांसद ऋषिकेश पोखरेलले माइकिङ गरेका छन् ।

बन्द सत्रका लागि प्रतिनिधिहरू हलभित्र प्रवेश गर्ने क्रम जारी रहेको जनाइएको छ ।