कटहरीमा लोकसेवा तयारी कक्षा

विराटनगर । मोरङको कटहरीका शिक्षित युवालाई लक्षित गरेर लोकसेवाको ४५ दिने तयारी कक्षा सुरु भएको छ ।  कटहरी गाउँपालिकाको आयोजनामा मंगलबारबाट सुरु भएको तयारी कक्षामा ८९ जना युवा सहभागी छन् ।

कटहरी–३ को जनप्रिय माध्यमिक विद्यालयमा सुरु भएको पहिलो दिनको कक्षामा मोरङका साहायक प्रमुख जिल्ला अधिकारी प्रदीपकुमार साहले विद्यार्थीलाई तयारी कक्षाको औचित्य र परिचयात्मक कक्षा सञ्चालन गरेका थिए ।

नेपालको प्रशासनिक क्षेत्रमा गाउँपालिकाबाट दक्ष र सक्षम जनशक्ति उत्पादन गर्ने उद्देश्य सहित लोकसेवा तयारी कक्षा सञ्चालन गरिएको गाउँपालिकाका प्रमुख प्रशासकीय अधिकृत मनोजकुमार साहले बताए । तयारी कक्षामा सहभागी हुन पालिकाले खुल्ला सूचना आह्वान गरेको थियो । 

गाउँपालिका अध्यक्ष देवराज चौधरीले विगतमा पूर्वाधार निर्माण शीर्षकमा बढी बजेट खर्चिनुपरेकाले लोकसेवा तयारी कक्षा सञ्चालन गर्न नसकिए पनि आउँदा दिनमा पालिकाले यस प्रकारका कक्षाहरूलाई निरन्तरता दिने बताए । तयारी कक्षामा पालिकाभित्रका ७ वटै वडाका शिक्षित युवाहरू सहभागी छन् ।