उदयपुरमा ट्रक दुर्घटना हुँदा चालक र सहचालककाे मृत्यु

विराटनगर । मदन भण्डारी लोकमार्ग अन्तरगत उदयपुरको उदयपुरगढी गाउँपालिका–७ अँधेरीमा आइतबार अपरान्ह ट्रक दुर्घटना हुँदा दुईजनाको मृत्यु भएको छ । 

अपरान्ह करीव सवा ३ बजेतिर भएको दुर्घटनामा मृत्यु भएका दुवैको सनाखत भने हुन नसकेको जिल्ला प्रहरी कार्यालय उदयपुरले जनाएको छ । मृतक ट्रकका चालक र सहचालक भएको जनाइएको छ ।

कटारीबाट गाईघाटतर्फ आउँदै गरेको बागमती प्रदेश ०६–०१ ख ०५०५ नम्बरको ट्रक आफैं अनियन्त्रित भई सडकबाट करीव ५० मिटर तल अधेरी खोलामा खसेको प्रहरीले जनाएको छ । 

दुर्घटनास्थलबाट गम्भीर अवस्थामा उद्दार गरिएका उनीहरूलाई उपचारका लागि जिल्ला अस्पताल उदयपुर लैजाने क्रममा बाटैमा मृत्यु भएको जनाइएको छ ।