ग्रामथानमा सडकै छेकेर माओवादीको सभा

विराटनगर । घिनाघाट–विराटचोक फोर लेन सडक नै छेकेर नेकपा माओवादी केन्द्रले शनिबार मोरङको ग्रामथानस्थित तेतरियामा सभा आयोजना गरेपछि त्यसको विरोध भएको छ । 

उपनिर्वाचनमा गाउँपालिका अध्यक्ष जितेको माओवादीले एक महिनापछि मतदातालाई धन्यवाद दिने भन्दै तेतरियामा सभा आयोजना गरेको हो । सभालाई माओवादीका अध्यक्ष पुष्पकमल दाहाल (प्रचण्ड) ले सम्बोधन गरेका थिए । 

सडकै छेकेर त्यसरी सभा गर्दा यातायात आवागमन प्रभावित भएको स्थानीयले गुनासो गरेका हुन् । 

गाउँपालिकाको कार्यालय नजिकै सडकमा मञ्च बनाएर माओवादीको सभा आयोजना गरेको थियो । सभाका कारण सडक अवरुद्ध हुँदा सर्वसाधारणले भने सास्ती व्यहोरेका थिए । 

बाटो जाम हुँदा एम्बुलेन्स लगायतका अत्यावश्यक सेवाका सवारी साधन समेत रोकिएका थिए । जसका कारण ट्राफिक प्रहरीले बाटो खुलाउन सास्ती व्यहोर्नुपरेको थियो । 

एम्बुलेन्स नै रोकिएपछि कार्यक्रम सञ्चालकले सडकमै बसेका पार्टी कार्यकर्ताहरूलाई बाटो खालि गरिदिन माइकबाट भन्नु परेको थियो ।

उक्त सभालाई सम्बोधन गर्दै माओवादी अध्यक्ष दाहालले कहिले कांग्रेस कहिले एमालेसँग मिलेर आफूले कमजोरी गरेको बताए । 

उनले कांग्रेस र एमालेसँग मिल्नु कमजोरी भएको बताए ।

दाहालले आगामी स्थानीय तह निर्वाचनमा २५० वटा बढी पालिकामा माओवादीले जित्ने समेत दाबी गरे । 

२०७९ को निर्वाचनमा ग्रामथानमा तेस्रो बनेको माओवादी केन्द्रलाई जनताले विश्वास गरेर यसपटक पहिलो बनाएको भन्दै आगामी निर्वाचनमा देशैभरी पहिलो बन्ने घोषणा गरे ।

उनले मोरङको ग्रामथान गाउँपालिकाको अध्यक्षसहित उदयपुरको दुई वटा वडामा भएको उपनिर्वाचनबाट दुवै वडाध्यक्ष जितेर माओवादी विरोधीहरूलाई जवाफ दिएको बताए ।

दाहालले देशमा रहेको भ्रष्टाचारको जरा उखेल्ने अभियानमा माओवादी लागेको बताए । उनले वर्तमान सरकारले कुलमान घिसिङलाई नेपाल विद्युत प्राधिकरणबाट निकाल्न खोजेको भन्दै रोष प्रकट गरेका थिए ।

यसैबीच, अध्यक्ष दाहालले शनिबार बिहान विराटनगर महानगरपालिका–१९ स्थित गिरिजाप्रसाद कोइराला क्रिकेट रंगशालाको स्थलगत अनुगमन समेत गरेका थिए । 

तर उनी अनुगमनमा पुग्दा रंगशालाको गेट बन्द भएका कारण बाहिरबाटै हेरेर फर्किएका थिए । उनी पुग्नुअघि रंगशालाको गेटमा ताला लागेको देखेपछि माओवादीका कार्यकर्ताहरूले ढुंगाले गेटको ताला फोड्ने प्रयास समेत गरेका थिए ।