रंगेलीमा काङ्ग्रेसले थालेको आन्दोलनमा पुगेका विराटनगरका मेयरलाई एमालेले बुझायो ध्यानाकर्षण पत्र

विराटनगर । नेकपा एमाले मोरङले विराटनगर महानगरपालिकाका मेयर नागेश कोइरालालाई बिहीबार ज्ञापन पत्र बुझाउँदै नगरको विकास निर्माणमा भइरहेको ढिलासुस्तीप्रति सचेत गराएको छ । एमालेकै जनप्रतिनिधिहरूको बहुमत रहेको विराटनगर महानगरपालिकामा एमालेकै सिंगो जिल्ला कमिटीको नेतृत्व गर्दै अध्यक्ष बाबुराम कार्कीले कोइरालालाई ६ बुँदे ध्यानाकर्षण पत्र बुझाएका हुन् । 

महानगरका जनप्रतिनिधिहरूको कार्यकाल गनेर बसेको एमालेले कोइरालाप्रति लक्षित गर्दै ध्यानाकर्षण पत्र बुझाउनुको पछाडि अन्य असन्तुष्टिभन्दा पनि कोइरालाकै पछिल्लो पटकको भूमिकासँग जोडिएको छ ।

मेयर कोइराला दुई दिनअघि मात्रै एमाले नेतृत्वको स्थानीय तहमा काङ्ग्रेसको नेतृत्वमा भएको आन्दोलनमा सहभागी भएपछि एमालेले पनि ‘काउन्टर’ दिँदै उनलाई ध्यानाकर्षण गराएको हो । 

मेयर कोइरालाले रंगेली नगरपालिका कर धेरै भएको भन्दै काङ्ग्रेसका स्थानीय केही नेता कार्यकर्ताहरूले सुरु गरेको आन्दोलनलाई समर्थन गर्न पुगेपछि यो विषयले राजनीतिक मोड लिएको हो । कोइरालाले बुधबार मात्रै काङ्ग्रेस उपसभापतिको हैसियतमा रंगेली पुगेर नगरपालिकाकै अगाडि आन्दोलनमा ऐक्यवद्धता जनाएका थिए । 

एमालेले भने एउटा स्थानीय तहको जनप्रतिनिधिको समेत जिम्मेवारीमा रहेको अवस्थामा अर्को  स्थानीय तह (पालिका) मा विरोध प्रदर्शनमा उत्रिनु पदीय रुपमा गैरजिम्मेवारपूर्ण कार्य भएको ठहर गरेको छ । त्यसैको जवाफमा एमाले मोरङकै नेतृत्वमा उनलाई बिहीबार ज्ञापनपत्र बुझाइएको हो ।

काङ्ग्रेसबाट विराटनगरको मेयरमा निर्वाचित कोइराला र एमालेबाट निर्वाचित उपमेयर शिल्पा निराला कार्कीलाई महानगरको विकास निर्माणसँग जोडिएका विषयमा गम्भीर हुन आग्रह गर्दै ध्यानाकर्षण पत्र बुझाइएको छ । 

एमाले जिल्ला कमिटीको प्रतिनिधि मण्डलले मेयर कोइरालाको कार्यकक्षमै पुगेर पहिलो पटक ज्ञापन पत्रमार्फत ध्यानाकर्षण गराएको हो । एमालेले महानगरमा निर्वाचित भएको २ वर्ष ५ महिना बितिसकेको भन्दै यस अवधिमा विकास निर्माणको सवालमा अपेक्षित काम नभएको आरोप लगाएको छ ।

एमालेले महानगरमा सडक निर्माण, ढल निकास, स्वास्थ्य, शिक्षा र अन्य पूर्वाधार सम्बन्धी कार्यहरू हुन नसकेको भन्दै मेयर कोइरालाको भूमिका माथि प्रश्न उठाएको छ । अध्यक्ष कार्कीले विराटनगरको समग्र विकास निर्माण तथा जनसरोकारका विषयहरूलाई अविलम्व समाधान गर्न मेयर कोइरालालाई चेतावनी दिएका छन् ।

एमालेले विराट राजाको दरवार, प्रधानमन्त्री पार्कलगायत विकास निर्माणको काममा भएको ढिलासुस्तीको मुख्य कारण मेयर कोइराला भएको आरोप लगाएको छ ।

साथै नगरपालिकाले सञ्चालन गर्ने नगर बस अविलम्व सञ्चालन गर्नुपर्ने, नगरभित्र फोहरमैला व्यवस्थापनमा देखिएको लापरवाही रोकिनु पर्ने, नगर क्षेत्रको खेलकुदको प्रवर्द्धनका लागि अविलम्ब नगर खेलकुद विकास समिति गठन गर्नुपर्ने, विराटनगरको डुवान र ढल निकासका लागि स्थायी समाधान गर्नुपर्ने र विगतमा सुरु गरिएका अधुरा विकास योजनाहरु सम्पन्न गर्नुपर्ने भन्दै ध्यानाकर्षण गराएको हो ।

एमालेको ध्यानाकर्षण पत्र बुझ्दै मेयर कोइरालाले विकास निर्माणका लागि बजेटको अभाव भएको बताएका थिए । उनले बजेटका लागि प्रदेश र संघीय सरकार समक्ष पहल गरिरहेको बताए ।