मोटरसाइकल चोरीमा संलग्न व्यक्तिसँग लागू पदार्थ पनि

विराटनगर । मोरङ प्रहरीले मोटरसाइकलमा चोरी संलग्न रहेको आरोपमा पक्राउ गरेका व्यक्तिसँग लागू पदार्थ समेत रहेको फेला पारेको छ ।

बिहीबार जिल्ला प्रहरी कार्यालय मोरङबाट खटिएको प्रहरी टोलीले चोरीको मोटरसाइकलसहित बुढीगंगा गाउँपालिका–५ बाट पक्राउ गरेका अमन चौधरीको साथबाट नाइट्राजेपाम ट्याब्लेट बरामद गरेको हो ।

विराटनगर महानगरपालिका–३ स्थित फुलबारी रेष्टुरेन्ट अगाडिबाट गत मंगलबार राती १ बजे चोरी भएको को ३७ प १२६ नम्बरको मोटरसाइकल चोरी भएको थियो ।

मोटरसाइकल चोरी गरी लैजाने कार्यमा संलग्न रहेको आरोपमा प्रहरीले महेश कुमार मेहतालाई चोरीमा प्रयोग गरेका सामग्रीसहित पक्राउ घटनास्थलबाटै पक्राउ गरेको थियो ।

मोटरसाइकल चोरेर फरार भएका चौधरीलाई भने प्रहरीले बिहीबार पक्राउ गरेको हो । पक्राउ पर्दा उनको साथबाट लागूपदार्थ समेत फेला परेको जिल्ला प्रहरी कार्यालय मोरङका प्रवक्ता प्रहरी नायव उपरीक्षक ज्ञानेन्द्र बहादुर बस्नेतले बताए ।

चोरीमा संलग्न रहेका दुवैलाई मोरङ जिल्ला अदालतबाट म्याद थप गरी थप अनुसन्धान अघि बढाइएको जनाइएको छ ।