सुन्दरहरैंचाको नगरसभाबाट पाँच विधेयक पारित

सुन्दरहरैंचा । मोरङको सुन्दरहरैंचा नगरपालिकाको १५ औं हिउँदे नगरसभाले ५ वटा  विधेयक पारित गरेको छ । नगर प्रमुख केदारप्रसाद गुरागाईंको अध्यक्षतामा विधेयक सभाको रूपमा रहेको हिउँदे सभामा नगरपालिकाले विधेयकहरू पारित गरेको छ । 

जसमा विनियोजन ऐन २०८१ लाई पहिलो पटक संशोधन गर्न बनेको विधेयक २०८१, आर्थिक ऐन २०८१ लाई पहिलो पटक संशोधन गर्न बनेको विधेयक २०८१, न्यायिक समितिले उजुरीको कारबाही किनारा गर्दा अपनाउनुपर्ने कार्यविधिका

सम्बन्धमा व्यवस्था गर्न बनेको विधेयक २०८१, न्यायिक समितिको फैसला तथा मिलापत्र कार्यान्वयन विधेयक २०८१ र सहकारी ऐन २०७५ लाई दोस्रो पटक संशोधन गर्न बनेको विधेयक २०८१ रहेको छ ।

नगर सभामा सरकारी विधेयक र अर्थ विधेयकको रूपमा रहेको विनियोजन ऐन २०८१ लाई पहिलो पटक संशोधन गर्न बनेको विधेयक २०८१ र आर्थिक ऐन २०८१ लाई पहिलो पटक संशोधन गर्न बनेको विधेयक २०८१ उप–प्रमुख अकली चौधरीले टेबल गरेकी थिइन् ।

यसैगरी अन्य विधेयकहरू विधायन समितिका संयोजक खेमप्रसाद न्यौपानेले टेबल गरेका थिए । प्रस्तुत विधेयक सर्वसम्मत रूपमा पारित भएका हुन् । 

नगर प्रमुख गुरागाईंले नगरपालिकाको प्रभावकारी प्रशासन, सुशासन र स्थानीय विकासमा यी विधेयकहरूले महत्वपूर्ण योगदान पुरयाउने बताए । उनले भने, ‘यो नगरसभा नगरपालिकाको व्यवस्थापकीय सुधार र जनताको आवश्यकतालाई सम्बोधन गर्ने दिशामा ऐतिहासिक बन्नेछ ।’

नगर सभाबाट पारित भएका यी सबै विधेयकहरू नगर प्रमुखद्वारा प्रमाणीकरण भई  नगरपालिकाको स्थानीय राजपत्रमा प्रकाशित भएपछि लागू हुने नगरपालिकाका प्रमुख प्रशासकीय अधिकृत विनोदकुमार न्यौपानेले बताए ।