इक्युवालिटी कप महिला क्रिकेट आजदेखि

विराटनगर । विराटनगरमा तेस्रो संस्करणको इक्यूवालिटी कप महिला क्रिकेट प्रतियोगिता हुने भएको छ । नेपाल क्रिकेट फाउण्डेसनको आयोजनामा मोरङ क्रिकेट संघ र विराटनगर महानगरपालिकाको प्रवर्द्धन तथा प्राविधिक सहयोगमा मंगलबारदेखि प्रतियोगिता हुन लागेको जनाइएको छ । 

प्रतियोगिताबारे जानकारी दिन विराटनगर–६ स्थित ज्वाला क्रिकेट मैदानमा आयोजित पत्रकार सम्मेलनमा फाउण्डेसनका अध्यक्ष अभिषेक श्रेष्ठले मोरङसहित इलाम, सप्तरी र सिरहाका महिला क्रिकेट खेलाडीहरूबीच प्रतिष्पर्धा हुने बताए ।

उनले महिला क्रिकेटको विकास गर्न र अन्तर्राष्ट्रिय महिला दिवसको अवसर पारेर तेस्रो संस्करणको इक्युवालिटी कप महिला क्रिकेट २०२४ को आयोजना गरिएको जानकारी दिए । 

प्रतियोगिता अन्तरगतका खेलहरू लिग चरणमा हुने जनाइएको छ । टि–२० फर्म्याटमा हुने प्रतियोगिता चार दिनसम्म चल्ने छ । प्रतियोगिताका लागि करीव ५ लाख ५० हजार रुपैयाँ खर्च हुने जनाइएको छ ।

क्रिकेट विदआउट बाउण्ड्रिजको सहयोगमा प्रतियोगिता खेल्ने खेलाडीहरूलाई उक्त मैदानमा प्रशिक्षण प्रदान गरिएको हो । प्रशिक्षणका लागि बाउण्ड्रिजका स्वयंसेवक  प्रशिक्षकहरूले सहयोग गर्दै आएका छन् । स्वयंसेवकहरूमा पाँचजना विदेशी क्रिकेट प्रशिक्षकहरू छन् ।