अन्तर्राष्ट्रिय प्याराग्लाइडिङ एक्युरेसीमा नेपाली खेलाडी अमन थापामगर च्याम्पियन

सुनसरी । धरानमा सम्पन्न अन्तर्राष्ट्रिय प्याराग्लाइडिङ एक्युरेसी प्रतियोगितामा नेपाली खेलाडी अमन थापा मगर ओभरअल च्याम्पियन बनेका छन् । 

चार दिनसम्म सञ्चालन भएको प्रतियोगितामा उत्कृष्ट प्रदर्शन गर्दै उनले उपाधिसँगै नगद १ लाख ५० हजार रुपैयाँ पुरस्कार प्राप्त गरेका छन् । 

प्रतियोगिताको ओभरअलतर्फ सागर नेपाली उपविजेता बने । उनले नगद १ लाख रुपैयाँ प्राप्त गरे । 

भारतका अक्ष कुमार तेस्रो हुँदै ७५ हजार रुपैयाँ पुरस्कार हात पार्न सफल भए । 

खुल्ला महिला विधातर्फ भारतकी श्रेयसी तामाङ विजेता बनिन् । उनले ४० हजार रुपैयाँ प्राप्त गरिन् । 

इक्सा राई दोस्रो हुँदै २५ हजार रुपैयाँ र विद्या राई तेस्रो हुँदै १५ हजार रुपैयाँ पुरस्कार प्राप्त गर्न सफल भइन् । 

टिमतर्फ अरुण जालारी, अञ्जन कुवर, पवन परियार र रिकी पोडे सम्मिलित टोली पहिलो भयो । उक्त टोलीले ५० हजार रुपैयाँ पुरस्कार प्राप्त गर्यो । 

युवराज सुनुवार, सुमनजंग थापा, विष्णु तिमल्सिना र रोशन बस्नेत सम्मिलित टोली दोस्रो हुँदै ३० हजार रुपैयाँ पुरस्कार प्राप्त गर्न सफल भयो । 

कृष्णबहादुर क्षेत्री, अमन थापा र विष्णु कार्कीको टोली तेस्रो हुँदै २० हजार रुपैयाँ पुरस्कार जित्न सफल भयो । 

एक्युरेसी नेसनल महिला विधातर्फ इक्सा राई पहिलो हुँदै ३० हजार रुपैयाँ प्राप्त गरिन् । 

विद्या राई दोस्रो हुँदै २० हजार रुपैयाँ र देवकीमाया सुनुवार तेस्रो हुँदै १० हजार रुपैयाँ पुरस्कार प्राप्त गर्न सफल भएका छन् । 

त्यस्तै, एक्युरेसी नेसनल पुरुषतर्फ अमन थापा पहिलो हुँदै ३० हजार रुपैयाँ प्राप्त गर्दा सागर नेपाली दोस्रो हुँदै २० हजार रुपैयाँ र पवन परियार तेस्रो हुँदै १० हजार रुपैयाँ पुरस्कार प्राप्त गरे । 

धरानमा पहिलो पटक आयोजना गरिएको अन्तर्राष्ट्रिय स्तरको प्याराग्लाइडिङ प्रतियोगिताले पर्यटन प्रवद्र्धनसँगै साहसिक खेलको सम्भावना उजागर गरेको आयोजकले जनाएको छ । 

प्रतियोगितामा नेपाल सहित विभिन्न देशका खेलाडीहरूको सहभागिता रहेको थियो ।