वर्षान्तमा सेयर बजारमा हरियाली, १४ अर्ब रुपैयाँको कारोबार

काठमाडौं । आर्थिक वर्षको अन्तिम दिन बुधबार सेयर बजार कारोबारले कीर्तिमान बनाएको छ। नेप्से परिसूचकमा दोहोरो अंकको बढोत्तरी भएको छ भने कारोबार रकममा पनि उच्च वृद्धि छ।

नेप्से ३४.६१ अंकले बढेर २७९४.७८ को विन्दुमा बजार बन्द हुँदा १४ अर्ब ३ करोड ४८ लाख रुपैयाँको कारोबार भएको छ ।

साउनका लागि बैंकहरुले कर्जाको ब्याजदर घटाएको सूचना जारी गरेसँगै सेयर बजारमा सकारात्मक प्रभाव परेको छ ।

१३ मध्ये व्यापारबाहेक सबै समूहका सूचक बढेका छन् । विकास बैंक समूह सर्वाधिक ३.८६ प्रतिशतले बढेको छ ।

लघुवित्त र निर्जीवन बीमा १.८५, वाणिज्य बैंक १.५९, म्युचुअल फण्ड १.५८, उतपादन तथा प्रशोधन १.३९ र जलविद्युत समूह १.२८ प्रतिशतले बढेको छ ।

५५ कम्पनीको सेयरमूल्य घट्दा माई खोला हाइड्रोपावरका लगानीकर्ता बढी नोक्सानमा रहे। उक्त कम्पनीको सेयरमूल्य ७.८७ प्रतिशतले घटेको छ। १९३ कम्पनीको सेयरमूल्य बढेको छ । बढेकामध्ये कुमारी बैंकको ऋणपत्र २०९० र थ्री स्टार हाइड्रोपावरको सेयरमा सकारात्मक सर्किट नै लागेको छ । यस्तै ग्रीन डेभलपमेन्ट बैंक ८.४१ प्रतिशतले बढेको छ ।

उच्च कारोबार हुने कम्पनीमध्ये बुटवल पावर बुधबार पनि पहिलो नम्बरमा रह्यो। उक्त कम्पनीको ६१ करोड ८७ लाख रुपैयाँको सेयर कारोबार भएको छ ।

यस्तै राधी विद्युतको ५६ करोड ६९ लाख, सानिमा माई हाइड्रोपावरको ३९ करोड ९२ लाख, लुम्बिनी विकास बैंक ३४ करोड २५ लाख र साहस ऊर्जाको ३३ करोड ७३ लाख रुपैयाँको कारोबार भएको छ ।

यसअघि मंगलबार नेप्से ३४.४६ अंकले बढेर २७६०.१७ को विन्दुमा पुग्दा ९ अर्ब ४१ करोड ९१ लाख रुपैयाँको कारोबार भएको थियो ।