माओवादी कोशी प्रदेश कोषाध्यक्ष पुरीलाई चार करोड तीन लाख जरिवाना

विराटनगर । विशेष अदालतले सम्पत्ति शुद्धीकरण मुद्दामा नेकपा माओवादी केन्द्र कोशी प्रदेश कमिटीका कोषाध्यक्ष गगन भनिने रेवतराज पुरीलाई दोषी ठहर गर्दै उनीबाट ४ करोड ३ लाख रुपैयाँ असुल्नुपर्ने फैसला गरेको छ ।

विशेष अदालतका अध्यक्ष टेकनारायण कुँवर, सदस्यहरु तेजनारायणसिंह राई र मुरारीबाबु श्रेष्ठको इजलासले ७ करोड ३५ लाख रुपैयाँको सम्पत्ति जोडेका पुरीको ३ करोड ३२ लाख रुपैयाँ मात्रै बैध देखिएको ठहर गरेको छ । 

बाँकी ४ करोड ३ लाख रुपैयाँ जरिवानाको फैसला भएको विशेष अदालतका प्रवक्ता धनबहादुर कार्कीले जानकारी दिए ।

पुरी सम्पत्ति शुद्धीकरण मुद्दामा एक साता अघि विशेष अदालतबाट दोषी ठहर भएका थिए । विशेष अदालतले पुरी विरुद्धको सम्पत्ति शुद्धीकरणसम्बन्धि मुद्दामा गत आइतबार फैसला गर्दै कसुर ठहर गरेको थियो ।

पुरीविरूद्ध २०७७ माघमा अकूत सम्पत्ति आर्जन गरेको भन्दै १२ करोड १३ लाख ६२ हजार रुपैयाँ बिगोसहित विशेष अदालतमा सम्पत्ति शुद्धीकरण अनुसन्धान विभागले मुद्दा दायर गरेको थियो । विशेष अदालतमा सम्पत्ति शुद्धीकरणसम्बन्धि मुद्दा चलिरहेकै बेला उनी झापाको क्षेत्र नम्बर ५ को प्रदेश सभा (२) बाट उम्मेदवार बनेका थिए ।

पुरीमाथि २० बिघा सरकारी जग्गा किर्ते गरी आफ्नो नाममा पारेर विभिन्न व्यक्तिहरुलाई बेचबिखन गरी सम्पत्ति बढाएको आरोप लागेको थियो । उक्त आरोपमा उनीमाथि सम्पत्ति शुद्धीकरण विभागले अनुसन्धान गरेर विशेष अदालतमा मुद्दा दायर गरेको थियो ।