एमाले कोशीले स्वास्थ्य नीति निर्माण गर्न बनायो कार्यदल

विराटनगर । नेकपा एमाले कोशी प्रदेश कमिटीको स्वास्थ्य विभागले कोशी प्रदेशको स्वास्थ नीति निर्माणका लागि कार्यदल निर्माण गरेको छ । विभागका सचिव रूपेश खतिवडाको संयोजकत्वमा तीन सदस्यीय कार्यदल निर्माण गरेको हो ।

पार्टी प्रदेश कार्यालय पाञ्चालीमा एमाले कोशी प्रदेश कमिटीका उपसचिव एवं स्वास्थ्य विभागका प्रमुख देवान राईको अध्यक्षतामा शनिबार बसेको बैठकले खतिवडाको संयोजकत्वमा कार्यदल निर्माण गरेको जनाइएको छ । कार्यदलमा विभागका सदस्यहरू महेश रोक्का र मनु शर्मा छन् ।

विभागको बैठकले कार्यदललाई सहयोग गर्न अन्जु सिग्देलको संयोजकत्वमा आर्थिक उपसमिति समेत निर्माण गरेको सचिव खतिवडाले जानकारी दिए । 

आर्थिक उपसमितिको सदस्यहरूमा भीम पौडेल, गोविन्द दुलाल, आङ्दावा शेर्पा र पेशल लम्साल रहेको जनाइएको छ ।

बैठकले कोशी प्रदेशका १४ वटै जिल्लाका स्वास्थ विभागका पदाधिकारीहरूको भेला आगामी माघ महिनामा र प्रदेशस्तरीय चिकित्सक भेला फागुनमा गर्ने निर्णय गरेको छ । 

त्यसैगरी विभागले कोशी प्रदेश सरकारका मुख्यमन्त्री हिक्मतकुमार कार्की र स्वास्थ्यमन्त्री भुपेन्द्र राईलाई प्रदेशभित्रका स्वास्थ्य क्षेत्रका जल्दाबल्दा समस्याबारे ध्यानाकर्षण गराउने निर्णय गरेको जनाइएको छ ।

एमालेले अहिलेको बाढी पहिरो र आगजनीबाट भएको धनजनमा भएको क्षति र क्षति न्यूनिकरणका लागि पूर्वतयारीको प्रभावकारी व्यवस्थापन गर्न सरकारलाई आग्रह गरिने विभागका प्रमुख देवान राईले बताए ।

त्यसैगरी झाडापखाला, डेंगी लगायतका महामारीको नियन्त्रण, सडक दुर्घटनाबाट भएको मानवीय क्षति कम गर्न समेत सरकारलाई आग्रह गरिने बताए । 

विभागका सचिव खतिवडाले मोरङको उर्लाबारीस्थित मदन भण्डारी ट्रमा सेन्टरलाई स्तरोन्नति गरी सवारी दुर्घटनाका घाइतेहरूको उपचारलाई प्राथमिकता दिन समेत सरकारलाई आग्रह गरिने बताए । 

साथै प्रदेश सरकारले चिकित्सकहरूको खटनपटनमा हुनसक्ने असमानता अन्त्य गर्न समेत पार्टीको तर्फबाट ध्यानाकर्षण गराउने तयारी रहेको उनले जानकारी दिए ।