भारतीय नम्बर प्लेटको स्कार्पियोबाट कटुवा पेस्तोलसहित तीन जना पक्राउ

विराटनगर : मोरङको धनपालथान गाउँपालिका-२ बाट प्रहरीले कटुवा पेस्तोलसहित तीन जनालाई पक्राउ गरेको छ ।

प्रहरीले  भारतीय नम्बर प्लेट विआर ०६ पिए १३६२ नम्वरको स्कारपियो गाडीलाई शंका लागि चेकजाँच गर्दा उक्त गाडीका चालक सर्लाहीको हरीपुर्वा-७ का २७ बर्षीय रबिन्द्र कुमार यादव र गाडीमा सवार रहेका सर्लाही हरीपुर्वा-७ कै २० बर्षीय कमलेश कुमार यादव र महोत्तरी गौशाला-६ का २२ बर्षीय राम दयाल यादव समेतलाई कटुवा पेस्तोल र गोलीसहित नियन्त्रणमा लिएको जनाइएको छ ।

कोशी प्रदेश प्रहरी कार्यालय बिराटनगरको चाडपर्व सुरक्षा बिशेष कार्ययोजना अनुसार प्रहरी चौकी अमाहीबरियातीबाट शुक्रबार राती साढे ९ बजे गस्तीमा खटिएको प्रहरी टोलीले धनपालथान-२ स्थित भित्री सडक खण्डमा सडक छेउमा रोकी राखेको उक्त स्कार्पियो समेत बरामद गरेको जनाएको छ ।

गाडीको ड्यासबोर्डभित्र लुकाई राखेको कटुवा पेस्टोल १ थान र त्यसको तीन राउण्ड गोली समेत बरामद गरेको जनाइएको छ । कटुवा पेस्तोलसहित पक्राउ परेका तीनै जनालाई इलाका प्रहरी कार्यालय रंगेलीबाट थप अनुसन्धान सुरु भएको जनाइएको छ ।