एमाले मोरङ अध्यक्षमा अञ्जु उपाध्यायको दावी

विराटनगर । यही फागुन १७–१९ मा हुने नेकपा एमाले मोरङको १० औं अधिवेशनमा अध्यक्ष हुने आकांक्षीहरू बढ्दै गएका छन् । जिल्ला अध्यक्षमा आफ्नो पनि दावी रहेको एमाले मोरङ सचिवालय कमिटी सदस्य अञ्जु उपाध्याय (शिवा) ले बताएकी छन् ।

उनले मोरङ जिल्लाले पहिलो महिला अध्यक्ष बनाउनुपर्ने माग राख्दै आफ्नो उम्मेदवारी हुने बताएकी हुन् । महिलाहरू समावेशी पदमा मात्र सीमित हुनुपर्छ भन्ने मान्यता तोड्न अध्यक्षको उम्मेदवारी दिन लागेको उपाध्यायको भनाइ छ । 

आफू मनमोहन अधिकारीको पालादेखिको पार्टी सदस्य भएको उल्लेख गर्दै उनले भनिन्, ‘पार्टीको धेरै पुरानो कार्यकर्ता हुँ, अब त धेरै ढिलो गर्याे भने उमेरले पनि नेटो काट्छ, त्यही भएर यस पटक अध्यक्षको उम्मेदवारी दिन्छु ।’ उनले पार्टी प्रतिनिधिहरूको बलियो समर्थन पाएर आफू अध्यक्षमा जित्ने दावी गरेकी छन् । 

विराटनगर–१०, तिनटोलिया निवासी उपाध्याय पुरानो कम्युनिष्ट राजनीतिक परिवारकी हुन् । विराटनगरमै बाल्यकाल बिताएकी उपाध्याय २०३६ सालदेखि कम्युनिष्ट राजनीतिमा जोडिएकी हुन् । 

बामपन्थी पृष्ठभूमिका मुकेश उपाध्यायसँग बैबाहिक जीवनमा बाँधिएपछि उनी विस्तारै कम्युनिष्ट राजनीतिमा जोडिएकी हुन् । उनका ससुरा महेश उपाध्याय नेपाल कम्युनिष्ट पार्टीको स्थापनाकालदेखि नै कम्युनिष्ट राजनीतिमा सक्रिय रही तत्कालीन पुष्पलाल समूहको केन्द्रीय सदस्य थिए । सोही पारिवारिक पृष्ठभूमिका कारण पनि उपाध्यायलाई राजनीतिमा आउन सजिलो भएको हो । 

२०४६ सालको जनअन्दोलनपछि बहुदलीय व्यवस्थाको स्थापनासँगै साङ्गठानिक रूपमा उनको सक्रियता बढ्यो । २०४८ सालमा तत्कालीन माले र माक्र्सवादी एकता पछि गठन भएको अनेम संघ नगर कमिटीको सदस्यमा सङ्गठित भएर उनले सांगठनिक जीवन सुरू गरेकी थिइन् । 

उनले अखिल नेपाल महिला संघको जिल्ला तह र युवा संघ नेपालको केन्द्रीय सदस्यसम्म भएर पार्टी काम गरेकी छन् । 

उपाध्याय नेपाली कच्चा पदार्थमा आधारित हस्तकलाका सामग्रीहरू संकलन गरी विभिन्न मुलुकमा निर्यात गर्ने कार्यमा पनि जोडिएकी छन् । 

एमाले पार्टी पंक्तिमा उपाध्याय उत्पादनसँग जोडिएकी एक आत्मनिर्भर उद्यमशील महिलाका रूपमा चिनिन्छन् । उनी नेपाल घरेलु तथा उद्यमी महिला समितिकी पूर्व केन्द्रीय अध्यक्ष हुन् ।

नेकपा एमाले मोरङको १० औं अधिवेशन यही फागुन १७ देखि १९ सम्म विराटनगरम हुँदैछ । 

जिल्ला अध्यक्ष हुन ठूलो संख्याले आकांक्षा देखाएका छन् । अहिले संगठन कमिटीको अध्यक्ष बनेका बाबुराम कार्की, जिल्ला समन्वय समिति प्रमुख अजम्बर राई, प्रदेशका पूर्वसांसद राजकुमार ओझा, विराटनगर महानगर कमिटीका पूर्वअध्यक्ष सागर थापा, जिल्ला सदस्य इरान राई र अहिले पार्टी महानगर इञ्चार्ज रहेका पर्शुराम बस्नेत, अर्का नेता महेश भट्टराईलगायतको नाम जिल्लाको भावी अध्यक्षका रूपमा प्रचारित छ । 

त्यस्तै यसअघि पार्टीको जिल्ला सचिव भएका तर बीचमा राजीनामा दिएका रूपेश खतिवडा पनि जिल्ला अध्यक्ष हुने दौडमा छन् । 

अध्यक्षमा धेरैको नाम चर्चा आए पनि पार्टीमा संस्थापन समूह भनिएकाले अन्तिममा बाबुराम कार्कीलाई र विनोद ढकाल पक्षले अजम्बर राईलाई अघि सार्ने  आन्तरिक तयारी गरेको स्रोतले जनाएको छ ।