विराटनगर । गैरकानुनी रूपमा नेपालीलाई प्रवेश गराएर जुवा खेलाउने विराटनगरका दुई क्यासिनोमा प्रहरीले आइतबार मध्यरात छापा मारेर सञ्चालकसहित १७ जनालाई पक्राउ गरेको छ । 

विराटनगरका क्यासिनोमा नेपालीलाई पनि जुवा खेलाउने गरिएको र त्यस बापत प्रहरी प्रशासनलाई उनीहरूले रकम बुझाउने गरेको समाचार उद्घोष दैनिकले आइतबार नै प्रकाशन गरेको थियो ।

समाचार प्रकाशित भएकै दिन प्रहरीले आफूमाथि लागेको आरोप चिर्न रातको ११ बजे छापामारी गरेको हो । पक्राउ पर्नेमा खेलाडी र क्यासिनोका सञ्चालक र ब्यवस्थापक पनि छन् ।

‘विराटनगरमा यतिका वर्षमा पहिलो पटक क्यासिनोका सञ्चालक पक्राउ गरेर प्रहरीले ठूलो काम गरेको छ’ एक क्यासिनोका जानकारले भने ।

बिग होटलमा सञ्चालित च्याम्पियन जोन क्यासिनोबाट प्रहरीले त्यसका ब्यवस्थापक काभ्रे जिल्ला बनेपा नगरपालिका–११ का ४५ वर्षीय रामकृष्ण गौतमसहित तीन जनालाई पक्राउ गरेको छ ।

बैतडीका ५३ वर्षीय हरि भट्ट र विराटनगर–८ का साजन साहसमेत सोही क्यासिनोबाट पक्राउ परेका छन् ।

मोरङका प्रहरी नायव उपरीक्षक कोपिला चुँडालका अनुसार रत्ना होटलमा सञ्चालित गोल्डेन क्वाइन क्यासिनोबाट त्यसका ब्यवस्थापक सोलुखुम्बुका ४३ वर्षीय लोकेन्द्रबहादुर बस्नेत (हाल काठमाडौं) सहित १४ जना पक्राउ परेका छन् ।

 सो क्यासिनोबाट पक्राउ पर्नेहरूमा विराटनगर–७ का २७ वर्षीय पवन गोश्वामी, विराटनगर–१ का ४५ वर्षीय तेजराज गिरी, २६ वर्षीय कृष्णकुमार कुर्मी र २४ वर्षीय विवेककुमार मण्डल, रामेछापका राज लामा भनिने मणि योञ्जन छन् ।

यस्तै झापा मेचीनगर–७ घर भई विराटनगर ६ वस्ने ४० वर्षीय रोशन गिरी, इटहरी–५ का २७ वर्षीय रूपेश दाहाल, वडा नम्बर ८ का २९ वर्षीय प्रमोद घिमिरे मोरङ सुन्दरहरैंचा–४ का २३ वर्षीय आदेश बिक, बुढीगंगा–२ का ४० वर्षीय मोहमद जाकिर हुसेन, कटहरी ४ का २६ वर्षीय सुरज राय, झापा दमक–४ का ४० वर्षीय घनश्याम गिरी,  उदयपुर चौदण्डीगढीका ३८ वर्षीय सन्तोष बस्नेत पनि पक्राउ परेका छन् । बस्नेत क्यासिनोका कर्मचारी हुन् ।

पक्राउ परेका ब्यक्तिहरूबाट जुवा खेल्न नगदको साटो प्रयोग हुने चक्कीसहित पक्राउ गरिएको छ । क्यासिनोले खेलाडीलाई खेल्नु अघि नगद लिएर भारू १ सय, १ हजार र १० हजार दरका चक्की दिने गरेको छ ।

उनीहरूलाई जुवातास सट्टेबाजीको दफा १२५ अन्तर्गत मुद्दा चलाइने भएको छ । जिल्ला अदालत मोरङबाट सात दिन थुनामा राखेर अनुसन्धान गर्न अनुमति लिइएको नायव उपरीक्षक चुडालले बताइन् । 

विदेशीलाई मात्रै प्रवेश गर्न दिइने भएकाले क्यासिनोमा सरकारले जुवाको अनुमति दिने गरेको भए पनि विराटनगरका क्यासिनोले धेरै नेपालीको सहज प्रवेश हुने गरेको उद्घोषले समाचार सार्वजनिक गरेपछि प्रहरीले कारवाही गरेको हो ।

क्यासिनोमा नेपालीलाई जुवा खेलाए नखेलाएको सम्बन्धित जिल्लाका प्रमुख जिल्ला अधिकारीको अगुवाइमा निगरानी गर्नुपर्ने नियम छ ।

क्यासिनो खेलेर लाखौं गुमाएका एक ब्यक्तिका अनुसार, विराटनगरमा क्यासिनोमा जुवा खेल्न कोशी प्रदेशका प्राय सबै जिल्लाका मानिस आउने गरेका छन् ।

भारतीय भन्दा नेपाली बढी आउने भएकाले विराटनगरका क्यासिनोमा स्थानीय नेपालीलाई आकर्षित गर्न जुवाडेलाई घरमै लिन र पु-याउन गाडीसमेत पठाउ“छन् ।  जुवा खेल्न जाने नेपाली ग्राहकहरू मध्ये कतिपयको  विवरण क्यासिनोको कर्मचारी र  कतिपयको  भारतीय उल्लेख गरिने गरिएको बताइन्छ ।

क्यासिनोमा रकम लेनदेन गर्न नेपाली मिटरब्याजी पनि क्यासिनो मै ढुकेर बस्ने गरेको बताइएको छ । जेनजी आन्दोलनपछि प्रहरी, प्रशासन मौन बस्दा सरकारी कर्मचारीसमेत सरकारी सवारी साधन लिएर क्यासिनोमा जुवा खेल्न जाने गरेका छन् ।

गत वर्ष विराटनगर महानगरका उपप्रमुख शिल्पा निराला कार्कीको नेतृत्वमा गएको अनुगमन टोलीले क्यासिनोमा नेपाली खेलाडीको संख्या उल्लेख्य फेला परेको थियो ।