धनकुटाको चुङमाङमा पिकअप दुर्घटना हुँदा ९ वर्षीया बालिकाको मृत्यु, आमा गम्भीर

धनकुटा । धनकुटाको हिलेबाट पाख्रिबास नगरपालिका– १० चुङमाङ जाँदै गरेको पिकअप दुर्घटना हुँदा ९ वर्षीया बालिकाको मृत्यु भएको छ । पाख्रिबास नगरपालिका– १० शिवालयकी संस्कृति राईको मृत्यु भएको प्रहरीले जनाएको छ । 

घाइते भएकी बालिकाको दुर्घटनास्थलबाट उद्धार गरी धनकुटा जिल्ला अस्पतालमा उपचारकै क्रममा मृत्यु भएको जिल्ला प्रहरी कार्यालय धनकुटाका प्रवक्ता प्रहरी नायब उपरीक्षक राजबाबु महर्जनले जानकारी दिए ।

उनकी आमा सरिता तामाङ राई गम्भीर घाइते भएको जनाइएको छ । दुर्घटनामा अरु १५ जना यात्रु समेत घाइते भएको जिल्ला प्रहरी कार्यालय धनकुटाले जनाएको छ ।

घाइते हुनेहरू मध्ये धनकुटा– ४ का ३७ वर्षीया देवी खत्री, ३६ वर्षीया देवीका खत्री, १० वर्षीय आजित खत्री, ४६ वर्षीया सुनिता खत्री, पाख्रीवासकी ६० वर्षीया लक्ष्मी राई, २२ वर्षीया रेबिका राई र ४० वर्षीया सानु आलेको धनकुटा जिल्ला अस्पतालमा उपचार भइरहेको प्रहरीले जनाएको छ ।

हिलेबाट चुङमाङ जाँदै गरेको को २ च १६१९ नम्बरको पिकअप आइतबार दिउँसो करिब ३ बजेतिर भारती माध्यमिक विद्यालय नजिकै दुर्घटना भएको हो ।

पिकअप सडकबाट करिब ४० मिटर तल खसेको थियो । गुडिरहेको बेलामा ब्रेक फेल भएर दुर्घटना भएको हुनसक्ने प्रहरीको अनुमान छ ।

घाइतेहरूको धनकुटा जिल्ला अस्पताल र धरानस्थित बीपी कोइराला स्वास्थ्य विज्ञान प्रतिष्ठानमा थप उपचार भइरहेको छ ।