चार दिनको गिरावटपछि सेयर बजार सूचकमा सुधार, जलविद्युतमै आकर्षण

काठमाडौं । लगातार चार दिनको गिरावटपछि सोमबार सेयर बजार परिसूचकमा सुधार आएको छ ।

नेप्से ४.७८ विन्दुले बढेर २६००.७६ को विन्दुमा रह्यो । कारोबार रकम भने घटेको छ।

साताको दोस्रो दिन पनि लगानीकर्ताको आकर्षण जलविद्युत कम्पनीका सेयरमा रह्यो ।

वाणिज्य बैंक, फाइनान्स, होटल तथा पर्यटन, जलविद्युत, लगानी, लघुवित्त र व्यापार समूहका सूचक बढेका छन् ।

व्यापार समूहको सूचक २.२० प्रतिशतले बढेको छ । विकास बैंक, जीवन बीमा, उत्पादन तथा प्रशोधन, म्युचुअल फण्ड, निर्जीवन बीमा र अन्य समूह घटेका छन् ।

१२४ कम्पनीको सेयरमूल्य घट्दा लगानीकर्ताले गुमाएका छन् ।

गुराँस लघुवित्तको सेयरमूल्य घटेर सर्किट लागेको छ । १२३ कम्पनीको सेयरमूल्य बढेको छ ।

जोशी हाइड्रोपावरको सेयर ९.९८ प्रतिशतले बढेको छ भने पञ्चकन्या माई हाइड्रोपावरको सेयर ९.४२ प्रतिशतले बढेको छ ।

६ अर्ब ४७ करोड १९ लाख रुपैयाँको सेयर कारोबार हुँदा सर्वाधिक कारोबार हुने कम्पनीको सूचीमा राधी विद्युत पहिलो नम्बरमा रह्यो ।

उक्त कम्पनीको ५२ करोड १८ लाख रुपैयाँको कारोबार भएको छ ।

यस्तै बुटवल पावरको ४२ करोड १७ लाख, ङादी ग्रुप अफ पावरको ३३ करोड ६० लाख र सानिमा माई हाइड्रोपावरको २८ करोड ३८ लाख र हिमालयन पावर पार्टनरको २६ करोड ८७ लाख रुपैयाँको सेयर किनबेच भएको छ ।

यसअघि साताको पहिलो दिन आइतबार नेप्से परिसूचक ३२.९३ को दोहोरो अंकले घटेर २५९५.९७ विन्दुमा रहँदा ९ अर्ब १४ करोड ५८ लाख रुपैयाँको सेयर किनबेच भएको थियो। कारोबारमा अग्रणी जलविद्युत कम्पनी थिए ।