सुनसरी प्रहरीले समात्यो एक हजार रुपैयाँ दरको झण्डै दुई कराेड नक्कली नेपाली नोट

विराटनगर, २९ माघ । सुनसरी प्रहरीले झण्डै दुई करोड नक्कली नेपाली नोट बरामद गरेको छ । भारतबाट नेपाल प्रवेश गराइसकेको एक हजार रुपैयाँ दरका १ करोड ८२ लाख ५१ हजार रुपैयाँ नक्कली नोटसहित प्रहरीले भारतीय नम्बर प्लेटको स्कार्पियो र त्यसका चालकलाई आइतबार साँझ नै नियन्त्रणमा लिएको हो ।

जिल्ला प्रहरी कार्यालय सुनसरीका प्रहरी उपरीक्षक विपिन रेग्मीले इनरुवा नगरपालिका–४ स्थित सुनसरी खोलाको पुलनजिकबाट भारतीय गाडीमा राखेर ल्याइरहेको नक्कली नेपाली रुपैयाँ बरामद गरेको जानकारी दिए । नक्कली नोटसँगै भारतको वीरपुर घर बताउने २२ वर्षीय मोहमद सैयदलाई समेत पक्राउ गरिएको बताए ।

सैयदले नै स्कार्पियो हाँकेर जाँदै गरेको अवस्थामा सवारीसाधन चेकजाँचका लागि खटिएको ट्राफिक प्रहरीको टोलीले बीआर ११ एक्स ३४२९ नम्बरको स्कोरपियोलाई रोकेको थियो ।

स्कार्पियो समेत चेकजाँच गर्दा पछाडिको भागमा बोराभित्र लुकाइछिपाइ राखेको अवस्थामा नक्कली नोट फेला परेको प्रहरीले जनाएको छ । प्रहरीले गाडीमा अर्को व्यक्ति पनि रहेको तर प्रहरीको चेकजाँच देखेपछि फरार भएको जनाइएको छ ।

सुनसरी प्रहरीले ठुलो परिणाममा नक्कली नेपाली नोट बरामद भएपछि थप अनुसन्धान अघि बढाएको जनाइएको छ । 

यसअघि पनि सुनसरीको इटहरी बजारबाटै १५ लाख ८७ रुपैयाँ नक्कली नोटसहित प्रहरीले दुईजनालाई पक्राउ गरेको थियो । पक्राउ पर्नेहरूमा संखुवासभाको पाँचपखन–५ घर भएका विवेक राई र संखुवासभाको मकालु–६ बस्ने अजय राई रहेका थिए ।