सोलुखुम्बुको थामेमा भीषण बाढीले दर्जनौं‌ घर बगाएको आशंका, दूधकोशी किनारमा उच्च सतर्कता

विराटनगर । खुम्बु पासाङल्हामु गाउँपालिका–५ स्थित थामे क्षेत्रमा शुक्रबार अपरान्ह अचानक आएको बाढीले ठुलो क्षति भएको छ । त्यहाँ हिमताल फुटेको आशंका गरिएए पनि यकिन हुन सकेको छैन । 

बाढीले थामेका आधाभन्दा बढि घरहरू बगाएको र अरु धेरै घरहरूमा क्षति पुगेको जनाइएको छ । थामे गाउँका धेरै घर लेदो सहितको बाढीले पुरिएको र घरहरू बगाएको छ । 

सोलुखुम्बु जिल्लाका प्रमुख जिल्ला अधिकारी देवी पाण्डे (खत्री) ले घटनाको पुष्टि गर्दै प्रभावित क्षेत्रमा प्रहरी परिचालन गरिएको जानकारी दिइन् । उनले घटनाको सवै विवरण प्राप्त नसकेको बताइन् ।

भीषण बाढी थामे गाउँ पसेपछि त्यहाँका घर र होटलमा रहेका मानिसहरू भागेर डाँडातिर गएको जनाइएको छ । प्रजिअ पाण्डेले मानवीय क्षति भएको खबर प्राप्त नभएको बताइन् ।

उनले हिमपहिरो आएको हो वा हिमताल फुटेको हो भन्ने यकिन हुन नसकेको पनि बताइन् ।

अहिले दूधकोशी नदीमा भीषण बाढी देखिएको छ । बाढी आएपछि दुधकोसीको तटीय क्षेत्रमा उच्च सतर्कता अपनाइएको जनाइएको छ । तटीय क्षेत्रमा नेपाल प्रहरी र सशस्त्र प्रहरी परिचालन गरिएको जनाइएको छ ।