झापाको भद्रपुरमा सुतेकै ठाउँमा खन्तीले हानेर साथीको हत्या

विराटनगर । झापाको भद्रपुरमा एक युवकले सुतेकै ठाउँमा साथीको हत्या गरेका छन् ।

भद्रपुर नगरपालिका–२ स्थित गौरीशंकर टोलमा लोकबहादुर राईले ३५ वर्षीय सनम राईको हत्या गरेको झापा प्रहरीले जनाएको छ ।

सनमको घरमा सुत्न गएका लोकबहादुरले बिहीबार बिहान करिव ५ बजेतिर खन्ती प्रहार गरेर हत्या गरेका हुन् । सनमको घटनास्थलमै मृत्यु भएको जनाइएको छ ।

लोकबहादुर गएराति सनमको घरमा गएर सुतेका थिए । सनमको टाउकोमा गम्भीर चोट रहेको प्रहरीले जनाएको छ ।

हत्यामा संलग्न लोकबहादुरलाई नियन्त्रणमा लिइएको जनाइएको छ । प्रहरीले घटनाको अनुसन्धान गरिरहेको जनाएको छ ।