आज मतदाता नामावली प्रकाशनदेखि मतदानसम्मको कार्यक्रम

विराटनगर । नेकपा एमाले मोरङको १० औं जिल्ला अधिवेशनको बन्द सत्र सकिएसँगै निर्वाचनको प्रक्रिया अघि बढेको छ ।

केन्द्रीय निर्वाचन आयोगका सदस्य समीर नेपालले आइतबार दिउँसो १ बजेदेखि नै निर्वाचनको प्रक्रिया अघि बढाउने तयारी भएपनि त्यो कार्य सम्भव नभएका कारण सोमबार बिहानदेखि मनोनयन दर्ता सुरु हुने प्रष्टीकरण दिएका छन् । 

उनले आइतबार बेलुका नै प्रतिनिधिहरूको नामावली प्रकाशन गर्ने घोषणा गरेका थिए । तर प्रतिनिधि मनोनितको बिषयमा बन्दसत्रको हलमा नाराबाजी भएपछि निर्वाचन कार्यक्रम सोमबार विहानद ८ बजेदेखि सुरु गर्ने निर्णय गरेको जनाइएको छ । सोमबार बिहान उम्मेदवारको नामावली प्रकाशनदेखि मतदानसम्मको कार्यतालिका प्रकाशन गरिएको छ । 

‘हामी प्रतिनिधिहरूलाई समयमै घर पठाउन प्रतिवद्ध छौं, आजै (आइतबार साँझ) मतदाताको नामावली आएपछि प्रकाशन हुन्छ’ उनले भने, ‘सोमबार बिहान मनोनयन दर्ताको काम अघि बढ्छ ।’ नेपालले घोषणा गरेपनि मतदाता नामावली प्रकाशन हुन सकेन ।

निर्वाचन सम्पन्न गर्न एमाले केन्द्रीय निर्वाचन आयोगका सदस्य नेपालको नेतृत्वमा बरिष्ठ अधिवक्ता सुरेशलाल श्रेष्ठको संयोजकत्वमा सात सदस्यीय निर्वाचन कमिटी बनाइएको छ । सोही कमिटीले १० औं जिल्ला अधिवेशनबाट चुनिने १६५ सदस्यीय कमिटी निर्वाचित भएको घोषणा गर्नेछ ।

निर्वाचन कमिटीले उम्मेदवारी दिएर नाम फिर्ता लिन चाहनेहरूलाई मनोनयन शुल्क फिर्ता दिने जनाएको छ । पदाधिकारीमा उम्मेदवारी दिनेले आफ्नो उम्मेदवारी प्रमाणित गराउनुपर्ने व्यवस्था गरेको छ । 

‘उम्मेदवार ‘बोनाफाइट’ छ भन्ने कुरा हेरिने छ, त्यसका लागि पार्टीकै नेतृत्वले निर्णय गर्नेछ’ निर्वाचन कमिटीका संयोजक श्रेष्ठले भने, ‘भड्किलो प्रचार गर्न पाइने छैन, २ बाई ४ इन्च साइजभन्दा ठुलो भिजिटिङ कार्डबाहेक अन्य ब्यानर पोस्टर टाँस्न पाइने छैन ।’

बन्द सत्रका क्रममा एमाले मोरङका संगठन कमिटीका अध्यक्ष बाबुराम कार्कीले आफ्नो प्रतिवेदनमाथि भएको ६ वटा क्षेत्रगत समूहको प्रस्तुति र प्रतिवेदनमाथि उठेका विषयको जवाफ दिएका छन् । उनको जवाफ लगत्तै प्रतिवेदन पारित भएको छ । 

प्रतिवेदन पारित भएसँगै अध्यक्षमण्डलका सदस्य ऋषिकेश पोखरेलले बन्दसत्रको हल निर्वाचन समितिलाई हस्तान्तरण गरेका थिए । 

प्रतिवेदनमाथि निर्वाचन क्षेत्रस्तरीय छलफल भएको थियो । क्षेत्र १ बाट गोपाल रिमाल, २ बाट महेन्द्र बिष्ट, ३ बाट भोला अधिकारी, ४ बाट सुरज न्यौपाने, ५ बाट पुनम सापकोटा र ६ बाट सागर थापाले छलफलको निश्कर्ष प्रस्तुत गरेका हुन् । 

जवाफमा संगठन कमिटीका अध्यक्ष कार्कीले एमालेले सबैलाई सँगै लिएर हिड्नुपर्नेमा आफू स्पष्ट रहेको बताए । उनले पार्टीभित्र सबै कार्यकर्ताले विश्वासिलो छहारी प्राप्त गर्नुपर्ने बताए । 

सागर थापाले ४६ जना प्रतिनिधि मनोनितको मापदण्डमाथि नेतृत्वमाथि प्रश्न गरेका थिए । त्यसलाई कार्कीले ‘जिम्मेवारपूर्वक राखिएको प्रस्तुति’ भनेर स्वीकार गरे ।

‘म सबै कुराको जिम्मेवारी लिन्छु, प्रश्नको जवाफ यही पार्टीले दिनुपर्छ’ उनले भने, ‘त्रुटिजति मेरो हो, राम्रो जति सबै जिल्ला कमिटीको होस् भन्ने चाहन्छु, पार्टीलाई राम्रो र सक्षम बनाउन सबैले साथ दिनु होला ।’

बन्द सत्रको अन्त्यमा एमाले केन्द्रीय सदस्य रामलाल साह र युवराज बाँस्कोटाले प्रस्तुत गरेको जिल्ला अधिवेशनको समसामयिक प्रस्ताव सर्वसम्मतिले पारित भएको छ । 

केन्द्रीय सदस्य साहले अधिवेशनमा उठेका कतिपय कुराहरू कार्यकर्ताहरूले आफ्नो मनमा लागेर उठाएको बताए । त्यसलाई कुनै पनि नेताले घोचपेचको रुपमा लिन नहुने बताए । 

‘हामी पन्छिन मिल्दैन, सच्याउने आँट पनि गर्नुपर्छ, सबैको एउटै बुझाई हुनुपर्छ भन्यो भने त्यो ठिक हुँदैन’ उनले भने, ‘सामूहिक प्रयासबाट हामी अघि बढौं, प्रजातान्त्रिक प्रक्रियालाई आत्मासात गरौं, दस्तावेजहरूलाई समयानुकूल रुपमा ग्रहण गरौं ।’

साहले एमाले र यसका नेतृत्वमाथि भएका आक्रमणलाई आफैमाथि भएको ठानेर प्रतिवाद गर्नुपर्ने बताए । उनले पार्टीभित्र कार्यकर्ताहरूलाई संस्थापन र विस्थापन भनेर विभाजित गर्ने प्रयास भइरहेको गुनासो गरे । 

‘यो पार्टीमा कसको योगदान कम छ र ?, संस्थापन र विस्थापन पक्ष भनेर नेताबाटै भेन्टिलेट भएको भए त्यो काम अब नगरौं’ साहले भने, ‘हामी सबै संस्थापन हो । नेतृत्व, नीति र छुट्टै दस्तावेज भएको भए पो भन्न मिल्छ, केही नभएपछि के को संस्थापन र विस्थापन ?’

मनोनित प्रतिनिधिबारे विवाद

यसैबीच, अधिवेशनको बन्दसत्र सकिएलगत्तै हलभित्र उपस्थित भएका प्रतिनिधिहरूले जिल्ला कमिटीले मनोनित गरेका ४६ जनाको बैधानिकतामाथि प्रश्न उठाउँदै नाराबाजी गरेका छन् । त्यसको नेतृत्व सागर थापाले गरेका हुन् । 

‘पार्टीको कुन कमिटीको निर्णयबाट ४६ जना मनोनित भएका हुन्, देखाइदिनु पर्दछ, यसको जिम्मेवारी कसले लिने हो भन्नु पर्दछ’ उनले भने, ‘मनोनित गरिएको विषय पार्टीको विधानसम्मत् छैन, खारेज हुनु पर्दछ ।’ 
उनले यसो भन्दा हलभित्र रहेका प्रतिनिधिहरूले समेत होहल्ला गर्दै प्रतिनिधि मनोनितको विषयमाथि प्रश्न खडा गरेका थिए ।