आइतबार नेप्से परिसूचकमा ५२ अंकको वृद्धि, साढे ७ अर्बको कारोबार

काठमाडौं, ३० असार । यो साता कारोबारको पहिलो दिन नेपाल स्टक एक्सचेञ्ज (नेप्से) परिसूचकमा उच्च अंकको वृद्धिसँगै कारोबार रकम पनि बढेको छ । आज नेप्से परिसूचक ५२.९७ अंकले बढेर २२५७.५९ को विन्दुमा कायम भएको छ ।

आइतबार तीन सय नौ कम्पनीको २ करोड २० लाख ४७ हजार ३ सय २७ कित्ता शेयर ९६ हजार २ सय ७४ पटक खरिदबिक्री हुँदा ७ अर्ब ६२ करोड ४ लाख ९८ हजार ५ सय २० रुपैयाँ बराबरको कारोबार भएको छ । आजको कारोबारमा सबै समूहको उपसूचक हरियो देखिएको छ । सबैभन्दा धेरै वाणिज्य बैंक उपसमूह ३.७४ र जलविद्युत् ३.३० ३० प्रतिशतले बढेको छ ।

विकास बैंक १.२०, वित्त १.३३, होटल तथा पर्यटन १.०७, लगानी १.३० र जीवन बीमा समूह २.०५ प्रतिशतले बढेको छ । त्यस्तै, उत्पादन तथा प्रशोधन २.६६, लघुवित्त ०.८२, म्युचुअल फन्ड १.७४, निर्जीवन बीमा १.२६, व्यापार २.२१ र अन्य समूह १.९९ प्रतिशतले बढेको छ ।

रिडी पावर कम्पनी लिमिटेड र माण्डु हाइड्रोपावर लिमिटेडको शेयर मूल्यमा सकारात्मक सर्किट लागेको छ । सबैभन्दा धेरै घट्नेमा भने बलेफी हाइड्रोपावर लिमिटेडको शेयर मूल्यमा ५.१२ प्रतिशतको गिरावट देखिएको छ ।

कारोबार रकमका आधारमा आज सबैभन्दा धेरै जानकी फाइनान्स लिमिटेडको शेयर २४ करोड २७ लाख ५८ हजार ५ सय ७२ बराबरको कारोबार भएको छ । त्यस्तै, कारोबार संख्याका आधारमा सबैभन्दा धेरै ग्लोबल आइएमई बैंक लिमिटेड प्रमोटर शेयर २० लाख ७५ हजार १ सय २ कित्ता किनबेच भएको छ ।