टिप्परले ठक्करबाट दुईको मृत्यु

उदयपुर । उदयपुरमा टिप्परले मोटरसाइकललाई ठक्कर दिंदा मंगलबार दुई जनाको मृत्यु भएको छ ।

चौदण्डीगढी नगरपालिकाको बेल्टारबाट गाईघाटतर्फ आउँदै गरेको प्रदेश १–०२–००१ ख ८५१४ नम्बरको गिट्टी बोकेको टिप्परले विपरीत दिशाबाट जाँदै गरेको प्रदेश १–०२–०५२ प ३९५८ नम्बरको मोटरसाइकललाई ठक्कर दिएको थियो ।

सो त्रियुगा नगरपालिका–१ फुलजोरमा भएको सो दुर्घटनामा मोटरसाइकलमा सवार २ जनाको मृत्यु भएको जिल्ला प्रहरी कार्यालय उदयपुरका प्रहरी निरीक्षक विद्यालाल साहले बताए ।

उनका अनुसार मृत्यु हुनेमा मोटरसाइकल चालक बेलका नगरपालिका–१ का ३० वर्षीय रवीन श्रेष्ठ र मोटरसाइकलमा सवार त्रियुगा–३ का २४ वर्षीय विरा राई छन् ।

टिप्पर चालक त्रियुगा–७ का ३१ वर्षीय भीमबहादुर राईलाई नियन्त्रणमा लिएर अनुसन्धान अघि बढाइएको प्रहरीले जनाएको छ ।