एसईई मौका परीक्षा दिने विद्यार्थीलाई निःशुल्क ट्यूसन पढाउँदै एउटा समूह

विराटनगर । मोरङको कटहरी गाउँपालिकामा आगामी एसईई मौका परीक्षाका लागि ८० जना विद्यार्थीलाई स्थानीय युवाले निःशुल्क ट्युसन पढाइरहेका छन् । कटहरीका तीन वटा माध्यमिक विद्यालयबाट यस वर्षको एसईई परीक्षामा १५ जनामात्रै उत्तीर्ण भएपछि स्थानीय युवाले निःशुल्क ट्युसन सञ्चालन गरेका हुन् ।

कटहरीबाट यस वर्ष एक सय ६० विद्यार्थी एसईईमा सहभागी थिए । अबको मौका परीक्षामा धेरैलाई उत्तीर्ण गराउन ट्युसनमा सहभागी विद्यार्थीले कति थप शिक्षा पाए भनेर शनिबारबाट प्रि–परीक्षा लिन पनि थालिएको छ । यो परीक्षाले पनि आगामी मौका परीक्षालाई सहयोग पुग्ने बताइएको छ ।

प्रि–परीक्षाले विद्यार्थीलाई आगामी मौका परीक्षामा उच्च मनोबलका साथ जानेका कुरा लेख्न सक्ने अभ्यास हुने बताइएको छ । कटहरीका शिक्षाप्रेमीहरूको समूहले मासिक एक लाख रुपैयाँ संकलन गरेर विद्यार्थीलाई बिहान ७ देखि १० बजेसम्म कटहरी–४ को खयरवना आधारभूत विद्यालयमा पढाउँदै आएको छ ।

ट्युसन पढाउने समूहका संयोजक गोकुल भट्टराईले निजी विद्यालयका विद्यार्थी उत्तीर्ण हुने र सामुदायिकका अनुत्तीर्ण हुने समस्या रहेकाले थप शिक्षा दिन ट्युसन सञ्चालन गरिएको बताए । यो ट्युसन विद्यालयले नै सञ्चालन गर्ने कोचिङ कक्षा जस्तै हो । गएको आर्थिक वर्षमा कटहरी गाउँपालिकाले शिक्षामा सवा करोड रुपैयाँ लगानी गरेको थियो ।

उनका अनुसार विद्यालयबाट बाहिरिएपछि विद्यार्थीले नियमित अध्यन गर्न पाउँदैनन् । ग्रामीण क्षेत्रका विद्यार्थी भएकाले शिक्षामा दिनुपर्ने समय परिवारलाई दिनुपर्ने बाध्यता छ ।

गरिबीका कारण कतिपय अभिभावकले चाहेर पनि छोराछोरीलाई विद्यालय बाहिर अतिरिक्त शिक्षा दिलाउन सकेका छैनन् । यो अवस्थामा आफूहरूले अभिभावकको जिम्मेवारी लिएर थप शिक्षा दिने अभियान चलाइएको भट्टराईको भनाइ छ ।

भट्टराईको समूहका मनोज कार्की, दीपक यादव, सरोज पोखरेल र संजीत साह सदस्य छन् । विद्यार्थीलाई राकेशराज घिमिरे, बिराज बराल, दिलिप बजगाईं र पशुपति नेपालले पढाउँदै आएका छन् । उनीहरूले ट्युसनमा सबै विद्यालय पढाउँछन् । निःशुल्क ट्युसनबाट कटहरीका तीन र विराटनगरका दुई सामुदायिक विद्यालयका विद्यार्थीले शिक्षा लिदैछन् ।

कटहरीका विद्यार्थीलाई निःशुल्क शिक्षा दिने अभियान थालिएपछि विराटनगरमा पढेका विद्यार्थी पनि कक्षामा उपस्थित हुन थाले । विद्यार्थी जहाँबाट आए पनि पढाउने समूहका सदस्य मनोज कार्कीले बताए ।

विद्यार्थीलाई ट्युसन पढाउने शिक्षकलाई दिइने पारिश्रमिकको खर्च समूहका सदस्यहरूले व्यक्तिगत संकलन गर्छन् । यो अभियानलाई नियमित गर्ने लक्ष्य रहेको उनीहरूको भनाइ छ ।

आगामी एसईई परीक्षालाई लक्षित गरेर तिहारपछिदेखि जति पनि विद्यार्थीलाई ट्युसन पढाइले समूहले जनाएको छ । निजी विद्यालय पढाउन नसक्ने अभिभावकका विद्यार्थी सरकारी विद्यालयबाट फेल भएकाले उनीहरूको उच्च शिक्षाको यात्रामा सहयोग गर्न अभियानलाई निरन्तरता दिइने उनीहरूले बताएका छन् ।