विद्यार्थीहरुको दवावपछि मुनलाइट होस्टलकी संचालिका मधु रेग्मी पक्राउ

विराटनगर । होस्टलमा बसेका छात्राहरुमाथि दुर्व्यवहार गर्ने विराटनगर–८ मधुमारास्थित मुनलाइट गर्ल्स होस्टलकी संचालिका मधु कटुवाल रेग्मी पक्राउ परेकी छन् । पीडित विद्यार्थीहरुले होस्टल संचालिका रेग्मीलाई पक्राउ नगरे आन्दोलनमा उत्रिने चेतावनी दिंदै जाहेरी समेत दिएका छन् । प्रहरीले पीडित विद्यार्थीहरुको जाहेरी बुझ्ने प्रक्रियामा रहेको जनाइएको छ । जिल्ला प्रहरी कार्यालय मोरङका प्रवक्ता प्रहरी नायव उपरीक्षक रञ्जन दाहालले होस्टल संचालक रेग्मीलाई पक्राउ गरिएको बताए ।

रेग्मीले मंगलबार साँझ विद्यार्थीहरु बसेको कोठामै प्रवेश गरेर उनीहरुलाई अपशब्द र दुर्व्यवहार गर्दै बलपूर्वक निकाल्ने प्रयास गरेकी थिइन् । उक्त घटनाको भिडियो बाहिरिएपछि छात्राहरु अध्ययनरत विराटनगर नर्सिङ क्याम्पस स्वतन्त्र विद्यार्थी युनियनले प्रेस विज्ञप्तिमार्फत रेग्मीलाई कारवाहीको माग गरेको हो ।

विराटनगर नर्सिङ क्याम्पस स्वतन्त्र विद्यार्थी युनियनकी अध्यक्ष प्रशंसा पौडेल र सचिव एलिसा राउतद्वारा हस्ताक्षरित विज्ञप्तिमा होस्टल संचालिका रेग्मीले विद्यार्थीहरुलाई अमानविय व्यवहार गरेको भन्दै भर्त्सना गरिएको छ ।

स्ववियूसहित क्याम्पस प्रशासन र विभिन्न दल निकट विद्यार्थी संगठनहरुले समेत विद्यार्थीहरुमाथि भएको दुर्व्यवहारको भर्त्सना गरेका छन् । 

रेग्मी पक्राउ परेपछि उनीहरुले मोरङका प्रमुख जिल्ला अधिकारी प्रेमप्रसाद भट्टराईलाई भेटेर कडा कारवाहीका लागि माग गर्दै ज्ञापन पत्र बुझाएका छन् ।

प्रमुख जिल्ला अधिकारी भट्टराईले पनि दोषी पक्राउ परिसकेको जानकारी दिंदै कानुन बमोजिम कारवाही हुने कुरामा विश्वस्त रहन आग्रह गरेका हुन् ।