अनिल पोखरेलविरूद्ध ठगी मुद्दा दायर

विराटनगर । प्रतिनिधिसभा सार्वजनिक लेखा समिति सभापति ऋषिकेश पोखरेलका पूर्व स्वकीय सचिव अनिलकुमार पोखरेलविरूद्ध जिल्ला अदालत मोरङमा ठगी मुद्दा दर्ता भएको छ । 

बुधबार सरकारी वकिल कार्यालय मोरङले उनीविरूद्ध मुद्दा दायर गरेको हो । जिल्ला अदालत मोरङका सूचना अधिकारी हेमबहादुर बुढाथोकीले दिएको जानकारी अनुसार एमाले मोरङका जिल्ला कमिटी सदस्यसमेत रहेका पोखरेललाई सरकारी वकिलको कार्यालयले ७ वर्षसम्म कैद र ७० हजार रूपैयाँसम्म जरिवानाको माग दाबी गरेको छ ।  

उनका अनुसार बुधबार अबेरमात्रै मुद्दा दर्ता भएकाले बिहीबार बयान र थुनछेक बहस हुनेछ । 

चिकित्साशास्त्रको स्नात्तक (एमबीबीएस) पढ्नलाई नाम निकालिदिने भन्दै सप्तरीको अग्नीसाइर कृष्णासवरन गाउँपालिका–५ बकधुवाका बौआलाल चौधरीसँग ३८ लाख ८० हजार रूपैयाँ लिएको आरोप पोखरेलमाथि छ । उनी पुस २५ मा विराटनगरबाटै पक्राउ परेका थिए । 

सार्वजनिक लेखा सभापति पोखरेलका स्वकीय सचिव रहेका पोखरेलको यो घटना त्यहीबेला सार्वजनिक भएको थियो, जतिबेला सभापति पत्नी अञ्जला कोइराला सहकारी ठगी प्रकरणमा मुछिएर फरार थिइन् । 

मोरङ धनपालथानको उमागौरी सहकारी ठगीमा पत्नीको नाम मुछिएपछि सभापति पोखरेलले आफू र परिवार जस्तोसुकै परीक्षा दिन पनि तयार रहेको अभिव्यक्ति दिंदै आएका थिए । 

त्यहीबेला स्वकीय सचिव पनि ठगी प्रकरणमा मुछिएपछि उनले स्वकीय सचिवलाई भने तत्कालै पदमुक्त गरेका थिए ।