केशलिया खोला विराटनगर-१२ र बर्जुतिर पस्यो (फोटो)

विराटनगर । विराटनगरको पश्चिममा रहेको केशलिया खोला विराटनगरको वडा नम्बर १२ र सुनसरीको बर्जू गाउँपालिका–२ भिमपुर बस्तीमा पसेको छ । अहिले दुवैतिर पानीको बहाव बढ्दै गएको जनाइएको छ । 

विराटनगर महानगरपालिकाका नगर प्रहरी प्रमुख राजन पौडेलका अनुसार मंगलबार दिउँसो १ बजेदेखि केसलिया खोलामा पानी भरिएर बस्तीमा पसेको जनाइएको छ । बस्तीको पानी नहरमा समेत पसेका कारण जोखिम बढ्दै गएको जनाइएको छ ।

महानगरपालिकाको डम्पिङ साइट नजिकैबाट केशलियाको बाढी बस्तीतिर पसेको हो । नगर प्रहरी प्रमुख पौडेलका अनुसार विराटनगर–१२ मा रहेको सम्पन्न बस्तीसहित त्यस क्षेत्रका टोलहरूमा पानी बढ्दै गएको छ । 

‘केशलिया खोलाको पानी नहर हुँदै डम्पिङ साइटतिरबाट ओभरफ्लो भएर आएको छ, अहिले पानी बढिरहेको छ’ उनले भने, ‘स्थानीयले दिउँसो १ बजेदेखि पानी बस्तीमा आएको जानकारी दिएका छन्, अहिले नगर प्रहरीको टोली प्रभावित क्षेत्रमा पुगेर अवलोकन गरेर आवश्यक पर्दा उद्धारको योजना बनाइरहेको छ ।’ 

बस्तीमा पानी पसेपछि साना सवारी साधनको आवागमन प्रभावित भएको छ । वडा नम्बर १२ हुँदै उक्त पानी वडा नम्बर १६ तिर बग्दै गइरहेको जनाइएको छ । बर्जुको भिमपुरमा पनि बाढीले घरहरू डुबानमा परेका छन् ।