क्यासिनोको विवादमा मध्यरातमा खुकुरी हानाहान

विराटनगर । मध्यरातको साढे १ बजे विराटनगर बसपार्कमा दुई युवा समूह बीच खुकुरी हानाहान भएको छ । घटनामा दुई जना घाइते भएका छन् ।

विराटनगर बसपार्कछेउ रहेको रत्ना होटलको क्यासिनोबाट शनिबार बिहान साढे १ बजे निस्किएका रोनाल कँडेल र बिक्रम थपलियाबीच बिवाद भएको थियो । विवादका क्रममा थपलियाले कँडेललाई खुकुरी प्रहार गरेपछि अन्य युवाले थपलियालाई कुटपिट गरेका थिए । दुबै जना घाइतेको उपचार भइरहेको छ । प्रहरीले नियन्त्रणमा लिएपछि कँडेलको समूहले थपलियालाई कुटपिट गरेको थियो ।

कँडेलको विराट नर्सिङ होममा र थपलियाको कोशी अस्पतालमा उपचार भइरहेको छ । उनीहरू दुबै जना विदेशीलाई मात्रै प्रवेश दिइने क्यासिनोबाट निस्किएको बताइएको छ । झगडा हुँदै गरेको सूचना पाएपछि प्रहरी पुगेर थपलियालाई नियन्त्रणमा लिएको प्रहरी नायव उपरीक्षक रञ्जनकुमार दाहालले बताए । 

ज्यान र अपहरण मुद्दा खेपिसकेका कँडेल र थपलिया पुराना चिनजानका भए पनि खुकुरी प्रहारसम्मको घटना कसरी भयो भन्ने खुलिसकेको छैन । कँडेलले ज्यान मार्ने उद्योगमा थपलियाविरुद्ध प्रहरीमा जाहेरी दिएका छन् । दुबै जना अस्पतालमा भएकाले विवाद बारे पछि बयानबाट खुल्ने नायव उपरीक्षक दाहालले बताए ।