सुनको मूल्यमा भारी गिरावट आउन सक्ने वर्ल्ड गोल्ड काउन्सिलको दाबी

काठमाडौं । अन्तर्राष्ट्रिय बजारमा सुनको मूल्यमा थप गिरावट आउन सक्ने संकेत देखिएको छ । वर्ल्ड गोल्ड काउन्सिल (डब्लुजीसी) ले सुनको मूल्य प्रतिऔंस ३,८५७ अमेरिकी डलरभन्दा तल झरेमा अर्को प्रमुख समर्थन बिन्दु ३,५०० डलरमा रहने जनाएको छ ।

काउन्सिलले सार्वजनिक गरेको पछिल्लो प्रतिवेदनअनुसार यदि सुनको मूल्य ३,८५७ डलरभन्दा तल झरिरह्यो भने ३,५०० डलरसम्म पुग्न सक्ने सम्भावना छ ।

यो स्तर जनवरी महिनामा बनेको उच्च मूल्यबाट करिब ३७ प्रतिशतको गिरावट हुने काउन्सिलको विश्लेषण छ । यस्तो गिरावट अघिल्ला प्रमुख मन्दी अवधिहरूसँग मेल खाने भएकाले ३,५०० डलरको स्तरलाई महत्वपूर्ण आधार बिन्दुका रूपमा हेरिएको छ ।

हाल अन्र्तरािष्ट्रय बजारमा सुन प्रतिऔंस करिब ४,०६३.८० डलरमा कारोबार भइरहेको छ । लन्डन बुलियन मार्केट एसोसिएसन (एलबीएमए) को गोल्ड प्राइस पीएम सूचक गत साता १ प्रतिशतले घटेर प्रतिऔंस ४,०२७ डलरमा पुगेको छ । यससँगै चालु वर्षको सुरुदेखि सुनको मूल्यमा ७.८ प्रतिशत गिरावट आइसकेको छ ।

प्रतिवेदनअनुसार अमेरिकी फेडरल रिजर्भले ब्याजदर यथावत् राख्ने निर्णय गरेपछि ब्याजदर सम्बन्धी अपेक्षामा आएको परिवर्तनले सुनको मूल्यमा दबाब सिर्जना गरेको छ । साथै अमेरिका–इरान तनावसँग सम्बन्धित घटनाक्रमका कारण तेलको मूल्य र मुद्रास्फीतिसम्बन्धी चिन्ता पनि लगानीकर्ताको निगरानीमा रहेको छ ।

बजारको नयाँ मूल्याङ्कनसँगै गोल्ड ईटीएफमा हुने लगानी प्रवाह सुस्त बनेको छ भने कमेक्समा सुनसम्बन्धी नेट लङ पोजिसन पनि घटेको काउन्सिलले जनाएको छ । यद्यपि विकल्प कारोबार गर्ने लगानीकर्ताले केही हदसम्म नकारात्मक पोजिसन घटाएका छन, जसको एक कारण सम्झौताहरूको अवधि समाप्त हुनु पनि रहेको प्रतिवेदनमा उल्लेख छ ।

काउन्सिलका अनुसार पछिल्लो एक महिनादेखि सुनको मूल्य सीमित दायराभित्र उतारचढाव गरिरहेको भए पनि मार्चको सुरुदेखिको ओरालो प्रवृत्तिभन्दा माथि जान सकेको छैन । प्रतिऔंस ३,९४३ डलरभन्दा तल झरेमा मूल्य थप घट्ने संकेत देखिने र त्यसपछि ३,८५७ देखि ३,८८७ डलरको दायरा महत्वपूर्ण प्राविधिक समर्थन क्षेत्र बन्ने उल्लेख गरिएको छ ।

यसैबीच, जापानी येनको मजबुतीले सुनलाई केही राहत दिन सक्ने विश्लेषण गरिएको छ । अमेरिका र जापानले संयुक्त रूपमा मुद्रा बजारमा हस्तक्षेप गरेपछि येन बलियो बनेको छ । काउन्सिलका अनुसार यदि बलियो येन र कमजोर अमेरिकी डलरको प्रवृत्ति कायम रह्यो भने त्यसले सुनको मूल्यलाई समर्थन गर्न सक्छ ।

आगामी दिनमा अमेरिकी फेडरल रिजर्भको मौद्रिक नीतिसम्बन्धी अपेक्षाले सुनको मूल्य निर्धारणमा मुख्य भूमिका खेल्ने काउन्सिलको भनाइ छ । जुलाई महिनाको उत्पादन तथा सेवा क्षेत्रका सूचकांक बलिया देखिएमा फेडले कडा नीति अपनाउने अपेक्षा थप बलियो हुन सक्छ ।

तर रोजगारी वृद्धिदर अपेक्षाकृत कमजोर रहने अनुमान गरिएको छ । साथै अमेरिकी राष्ट्रपति डोनाल्ड ट्रम्पले इरानसँग नयाँ वार्ताको घोषणा गरेपछि अमेरिका–इरान तनाव केही कम हुन सक्ने र यसले थप ब्याजदर वृद्धिको चिन्ता घटाउन मद्दत पुग्ने प्रतिवेदनमा उल्लेख गरिएको छ । एएनआई