राष्ट्रिय सेवा दलका ५ सय २८ क्याडेट दीक्षित

सुनसरी । नेपाली सेनाको राष्ट्रिय सेवा दल पूर्वी तालिम शिक्षालयमा सञ्चालन भएको सि.सं ५१ औं एनसीसी जुनियर डिभिजन तालिमको दोस्रो चरणमा ५ सय २८ क्याडेट दीक्षित भएका छन् । 

पूर्वी तालिम शिक्षालय केराबारी मोरङमा बिहीबार आयोजित दीक्षान्त कवाज समारोहमा उनीहरुलाई दीक्षित गरिएको हो । 

राष्ट्रिय सेवा दल पूर्वी शिक्षालयले देशका १८ विद्यालयका क्याडेटहरूलाई तालिम दिएकोमा बिहीबार एक समारोहको आयोजना गर्दै उनीहरूको तालिम सफलतापूर्वक सम्पन्न भएको घोषणा गर्दै उत्कृष्ट गर्नेहरूलाई पुरस्कार र प्रमाणपत्रसमेत वितरण गरिएको हो । 

तालिममा प्रत्येक विद्यालयबाट ३० जनाको दरले क्याडेट सहभागी भएका थिए । जसमा १५ छात्र र १५ जना छात्रा रहेका थिए । 

तीन सातासम्म दिइएको उक्त तालिममा सैनिक आवासीय महाविद्यालयकी क्याडेट सुम्निमा लिम्बू छात्रातर्फ सर्वोत्कृष्ट भएकी छन् । 

पशुपती इङ्लीस बोर्डिङ स्कुल इटहरीका क्याडेट आयुस राई छात्रतर्फ सर्वोत्कृत हुँदै पुरस्कृत भए । 

सहभागी १८ विद्यालयमध्ये सिन्धुलीको आधुनिक बोर्डिङ स्कुल सर्वोत्कृष्ट प्लाटुनबाट पुरस्कृत भएको छ । 

दीक्षान्त कार्यक्रममा बोल्दै नेपाली सेनाको पूर्वी पृतना हेडक्वाटर इटहरीका पृतनापति उपरथी गौरबकुमार केसीले राष्ट्रिय एकताको भावना लिई काम गर्न क्याडेटहरुलाई निर्देशित गरे । 

कार्यक्रममा दीक्षित क्याडेटहरुले खुकुरी डिल, तेक्वान्दो पीटी, नृत्य प्रस्तुत गरेका थिए ।

नेपाली सेनाले देशभरका विभिन्न सरकारी तथा निजी विद्यालयहरुमा अध्ययनरत छात्रछात्राहलाई सहभागी गराई राष्ट्रिय सेवा दल तालिम सञ्चालन गर्दै आएको छ । 

यस अन्तर्गत उच्च माध्यमिक विद्यालयका छात्रछात्राहरुलाई सिनियर डिभिजन तालिम तथा माध्यमिक विद्यालयका छात्रछात्राहरुलाई जुनियर डिभिजन तालिम सञ्चालन गरिन्छ ।