विराटनगर ओपन स्काउट क्र्यूद्वारा शुभकामना आदान–प्रदान

विराटनगर । विराटनगर ओपन स्काउट क्र्यूको आयोजनामा बुधबार विराटनगरमा आसन्न चाडबाडहरूको अवसरमा शुभकामना आदान प्रदान गरिएको छ ।

विराटनगर–७ स्थित सत्यनारायण माविको प्राङ्गणमा बडादशैं, तिहार, छठ र नेपाल सम्वत् लगायतका प्रमुख चाडबाडको अवसरमा शुभकामना आदान प्रदान गरिएको हो ।

विराटनगर ओपन स्काउट क्र्यूका अध्यक्ष नवलप्रसाद उपाध्यायको अध्यक्षतामा आयोजित सो कार्यक्रममा विराटनगर महानगरपालिकाकी उपप्रमुख शिल्पा निराला कार्की, नेपाल स्काउटका सह–प्रमुख आयुक्त किरण गिरी, कोशी प्रदेश स्काउटका प्रदेश प्रमुख आयुक्त हेमन्त भण्डारी लगायतले शुभकामना दिए ।

स्थानीय स्काउट विराटनगर महानगरपालिकाको व्यवस्थापनमा आयोजित उक्त कार्यक्रममा स्काउटरहरूले विभिन्न गीत संगीतमा नृत्य तथा कविता बाचन लगायतका कार्यक्रम गरेका थिए । कार्यक्रममा कोशी प्रदेशका १५ वटा स्कुलका २८० जना स्काउटरहरू सहभागी भएका थिए ।

कार्यक्रममा १४ वटा स्थानीय स्काउटका प्रमुख आयुक्तहरूले समेत शुभकामना दिएको विराटनगर ओपन स्काउट क्र्यूका सचिव कुशेश्वर रायले बताए ।