धरान–१ मा हर्क आफैं पछाडि, तीन क्षेत्रका उम्मेदवार भने अगाडि

विराटनगर । धरान उपमहानगरपालिकाको मेयरबाट राजिनामा दिंदै श्रम संस्कृति पार्टी खोलेर धरान–१ मा प्रतिनिधिसभा सदस्यको चुनाव लडेका हर्क साम्पाङ प्रतिष्पर्धामा भने पछि परेका छन् । तर उनको पार्टीबाट माटो चुनाव चिन्ह पाएर उम्मेदवार बनेका अन्य तीन उम्मेदवारले अग्रता कायम गरेका छन् ।

धरान–१ मा रास्वपाबाट गोमा तामाङले अग्रता बनाएकी छन् । हर्क उनीभन्दा निकै पछाडि परेका छन् । तामाङले ४६१ मत प्राप्त गर्दा हर्कले १५४ मत मात्रै पाएका हुन् ।

श्रम संस्कृति पार्टीका उम्मेदवार पाँचथर, धनकुटा र भोजपुरमा अग्रता बनाएका छन् । 

पाँचथरमा श्रम संस्कृतिका हस्त राज शेर्माले ३०३ मत पाएका छन् । शुक्रबार अपरान्ह सुरु भएको मतगणनाको पहिलो परिणाम अनुसार दोस्रो स्थानमा कांग्रेसका नरेन्द्र कुमार केरुङ छन् । केरुङले १८६ मत पाएका हुन् ।

धनकुटामा सानबहादुर राई २८५१ मतसहित अघि छन् । एमालेका राजेन्द्र कुमार राई २००१ मतका साथ उनलाई पछ्याइरहेका छन् ।

भोजपुरमा मतगणना सुरु हुँदा माटोका ध्रुवराज राईले झिनो मतान्तर कायम गरेका छन् । उनले ४६७ मत प्राप्त गर्दा एमालेका शेरधन राईले ४६० मत ल्याएका छन् ।