‘रंगेली’ मा दयाहाङको ग्याङस्टार लुक्स

काठमाडौं : महाशिवरात्रीको अवसर पारेर आगामी फागुन २५ गतेबाट प्रदर्शन हुन लागेको फिल्म ‘रंगेली’मा अभिनेता दयाहाङ राई ग्याङस्टार भूमिकामा देखिने भएका छन् ।

लक्ष्मीपूजाको अवसर पारेर सार्वजनिक गरिएको फर्स्टलुक पोस्टरमा उनी बन्दुक ताकेको अवस्थामा चित्रित छन् । कानमा मुद्रा लगाएका उनी ‘रफटफ’ देखिन्छन् । उनलाई ‘विजय’ नामबाट चिनाइएको छ ।

अर्जुन सुवेदीको लेखन तथा निर्देशन रहेको फिल्ममा दयाहाङका साथै मिरुना मगर, अर्पण थापा, प्रवीण खतिवडा, रमेश बुढाथोकी लगायतको पनि प्रमुख भूमिका छ । फिल्मका गीतहरूमा हर्क साउद, अर्जुन सुवेदी र सबिन सिंहको शब्द रचना तथा सुशान्त गौतम र हर्कुलस बस्नेतको संगीत छ ।

फिल्मका कार्यकारी निर्माताहरू जीतेन्द्र खतिवडा र अनुजजङ्ग थापा हुन् । निर्माताहरू संसार चौलागाईं र रमेश भट्टराई वशिष्ठ हुन् भने युवक कार्की र शिवशङ्कर चौलागाईं सह–निर्माता हुन् । विवेक खड्का (योलो) एसोसियट निर्माता हुन् । फिल्मलाई सुशन प्रजापतिले छायाङ्कन गरेका हुन् ।

अस्ट्रेलिया र अमेरिकामा कलाकारसहित प्रिमियरको तयारी भइरहेको फिल्मको जापान, कोरिया र हङकङमा उज्ज्वल गुरागाईं र यूएनए इन्टरटेन्मेन्ट, अमेरिकामा ‘एक्का बास्सा इन्टरटेन्मेन्ट’ र ‘लाइभ एट प्रिजेन्ट’ तथा अस्ट्रेलियामा ‘हट बिट्स ईभेन्टस्’ले प्रदर्शन गर्दैछन् ।