सोलुको हर्कटे खोलाले मोटरसाइकलसहित बगाउँदा ३८ वर्षीय तामाङको मृत्यु

विराटनगर । सोलुखुम्बुको थुलुङ दुधकोशी गाउँपालिका–१ खत्रीगाउँस्थित हर्कटे खोलाले मोटरसाइकलसहित बगाउँदा एक युवकको ज्यान गएको छ । 

मंगलबार साँझ हर्कटे खोलामा आएको बाढीले बगाउँदा थुलुङ दुधकोशी गाउँपालिका–८ अम्रासका ३८ वर्षीय मिङमार तामाङको मृत्यु भएको जनाइएको छ । 

नेलेमा इलेक्ट्रिक पसल सञ्चालन गर्दै आएका तामाङलाई नेले हाटबाट घर फर्किने क्रममा हर्कटे खोलामा आएको बाढीले बगाएको थियो ।

स्थानीयले खोलामा मोटरसाइकलको लाइट बलिरहेको देखेपछि प्रहरीलाई खबर गरेका थिए । 

तामाङको शव सडकबाट करीव तीन सय मिटर तल फेला परेको सोलु प्रहरीले जनाएको छ । उनको शव पोष्टमार्टमका लागि थुलुङ दुधकोशी अस्पताल मुक्ली पठाइएको जनाइएको छ ।