सालकको खबटा बरामद

विराटनगर । संखुवासभाको भोटखोला गाउँपालिका– २ चेम्ताङबाट सालकको खबटासहित १ जनालाई प्रहरीले पक्राउ गरेको छ ।

बुधबार साँझ प्रहरी चौकी चेपुवाबाट खटिएको प्रहरी गस्ती टोलीले ६–७ जनाको समूहले सेतो बोरामा भारी बोकी हिडिरहेकोमा उनीहरुले गस्तिमा खटिएको प्रहरी टोलीलाई देखेपछि बोरा फाली भागेका थिए ।

प्रहरीले पछ्याउँदै जाने क्रममा स्थानीय ३५ बर्षीय छिरिङ भोटेलाई पक्राउ गरेको र ती बोराहरु खोलेर हेर्दा बोराभित्र सालकको खबटा  बरामद भएको हो ।

पक्राउ परेका भोटेको सम्बन्धमा थप अनुसन्धान भइरहेको तथा फरार रहेका अन्य व्यक्तिहरुको खोजतलास भइरहेको जिल्ला प्रहरी कार्यालय संखुवासभाले जनाएको छ ।