विराटनगरबाट काठमाडौं जाँदै गरेको माइक्राेलाई इभीले ठक्कर दिंदा १६ यात्रु घाइते

विराटनगर । विराटनगरबाट काठमाडौं जाँदै गरेको माइक्रो बसलाई काठमाडौंबाट जनकपुर आइरहेको इभीले मंगलबार अपरान्ह २ बजेतिर ठक्कर दिंदा १६ जना यात्रु घाइते भएका छन् । 

माइक्रो बसलाई विपरित दिशाबाट आइरहेको इभीले खुर्कोट बजारबाट डेढ किलोमिटर पर सुनकोशी मरिन डाइभर्सन नजिकै ठक्कर दिंदा बालबालिकासहित दुवै सवारी साधनका १६ जना यात्रु घाइते भएका छन् । 

दुईजनाको अवस्था गम्भीर रहेकोले उनीहरूलाई भने उपचारका लागि काठमाडौं लगिएको जिल्ला ट्राफिक प्रहरी कार्यालय सिन्धुलीले जनाएको छ । 

अन्य घाइतेहरूको खुर्केटस्थित सामुदायिक अस्पतालमा उपचार भइरहेको र उनीहरूलाई पनि थप उपचारका लागि काठमाडौं पठाउने तयारी भइरहेको जनाइएको छ । 

दुर्घटनामा माइक्रोका चालक दिपक कार्कीको खुट्टा भाँचिएको जनाइएको छ । उनको पनि सामुदायिक अस्पतालमै प्राथमिक उपचार भइरहेको छ ।

काठमाडौंबाट आइरहेको इभीका चालकले लागूपदार्थ गाँजा सेवन गरेको प्रहरीलाई उदृत गर्दै स्थानीयले जानकारी दिएका छन् । उक्त इभी विपरित दिशाबाट तिब्र गतिमा आएर माइक्रोको अगाडि ठोक्किएको जनाइएको छ ।