भाषण भूषणबिनै उद्योग संगठनले भव्य मनायो चाडबाडको शुभकामना कार्यक्रम (फोटो)

विराटनगर । उद्योगी व्यवसायीहरूको संस्था उद्योग संगठन मोरङले भाषण भूषणबिनै शुभकामना आदान प्रदान कार्यक्रम भव्य रूपले मनाएको छ । 

उक्त अवसरमा संगठनको कार्यालयमा सोमबार चाडबाडको शुभकामना आदान प्रदान कार्यक्रम आयोजना गरिएको हो ।

उक्त अवसरमा संगठनका अध्यक्ष राकेश सुरानाले आमन्त्रित सबैलाई स्वागत गरेका थिए । उनले मुलुकको उद्योग क्षेत्रमा लामो समयदेखिको निरासालाई दिपावली, छठ, उँधौली उँभौली, नेपाल सम्बत् लगायतका चाडबाडहरूको माध्यमबाट आशामा बदलिने अपेक्षा लिइएको बताए ।

संगठनका कार्यकारी निर्देशक चुडामणि भट्टराईले कार्यक्रम संचालन गर्ने क्रममा सुरुमै कुनैपनि भाषण भुषण नराखिएको जानकारी दिएका थिए । भाषणको साटो विराटनगरस्थित लिलिपुट प्रिमियर इलिमेन्ट्री स्कुलका विद्यार्थीहरूले देउसीभैलो गाएर कार्यक्रमको सुरुवात गरेका थिए ।

स्कुलका साना साना विद्यार्थीहरूले नै विभिन्न गीत संगीत र नृत्य प्रस्तुत गरेर मनोरञ्जन दिलाएका थिए ।

शुभकामना आदान प्रदान कार्यक्रममा उद्योगी व्यवसायी संघसंस्थाका प्रमुख तथा प्रतिनिधिहरू, राजनीतिक दलका नेता कार्यकर्ता, प्रशासनिक क्षेत्रका प्रमुखहरू, नागरिक समाज, सञ्चारकर्मीहरू लगायतको भव्य उपस्थिति रहेको थियो ।