जुवातास खेलेको आरोपमा कोशीका सांसद राजभण्डारी सहित ११ जना पक्राउ

विराटनगर । कोशी प्रदेश सभाका सदस्य एवं पूर्व मन्त्री बुद्धिकुमार राजभण्डारी जुवातास खेलेको आरोपमा पक्राउ परेका छन् । राजभण्डारीसहित ११ जनालाई काठमाडौँ महानगरपालिका–८ गौरीघाटबाट नियन्त्रणमा लिइएको प्रहरी स्रोतले जनाएको छ ।

सरकार परिवर्तनसँगै राजनीतिक परिस्थितिमा आएको बदलावले कोशी प्रदेश सभाको बैठक बस्न सकेको छैन । गत असार ८ गते कोशी प्रदेशको वार्षिक बजेट पारित भएसँगै प्रदेश सभाको बैठक अनिश्चितकालका लागि स्थगित छ । 

प्रदेश सभाको बैठक नहुँदा सांसदहरू आफ्नो क्षेत्रमा जनताको गुनासो सुन्ने, बजेट कार्यन्वयनमा सहयोग गर्ने र त्यसबाट पनि फुर्सद हुँदा निजी काममा संलग्न हुँदै आएका छन् । 

अहिले सांसदहरू फुर्सदिला हुँदा दिन कटाउन जुवातासमा समेत संलग्न हुने गरेको तथ्य पूर्वमन्त्री राजभण्डारी पक्राउको घटनाले पुष्टि गरेको छ । 

पक्राउ पर्नेमा राजभण्डारी सहित सोलुखुम्बुकै एमाले नेता वीरबहादुर राई, कलाकार पुरुषोत्तम शर्मा, दीपक खड्का, भीमबहादुर साम्बाहाङ्फे, रवि श्रेष्ठ, उत्तमकुमार राई, अनिष तामाङ, ठूला तामाङ, माधव थापा  र कोठाधनी काभ्रेको बनेपा नगरपालिका-१२ घर ठेगाना भएका राजु महतलाई पक्राउ परेको प्रहरीले जनाएको छ । 

उनीहरु शनिबार साँझ करिव सवा ६ बजेतिर जुवातास खेलिरहेको अवस्थामा पक्राउ परेका हुन् । प्रहरीले त्यहाँबाट एक लाख ५० हजार रुपैयाँ नगदसहित १६ बुक तास समेत बरामद गरेको जनाइएको छ । उनीहरूलाई प्रहरी वृत्त गौशालामा राखिएको जनाइएको छ ।