बखरीमा दिनदहाडै चोरी

विराटनगर । विराटनगर–१२ को एक घरबाट दिन दहाडै लाखौं मूल्यको धनमाल चोरी भएको छ । 

विराटनगर–१२ कामतचोकका राकेश यादवको घरबाट असोज ३ गते दिउँसो चोरी भएको हो । घरमा कोही पनि नभएको मौका छोपी यादवको घरको दुई कोठामा रहेको दराज फोडेर चोरी भएको हो ।

यादवको  घरको एउटा कोठाबाट झण्डै ८ तोला सुनको विभिन्न गरगहना, आधा किलो चाँदीको गहना र नगद २५ हजार चोरी गरेका छन भने अर्को कोठाबाट आठ आना सुनको कानको झुम्का १ जोडी, १ जोडी चाँदीको पाउजु र नगद २५ हजार चोरी भएको बताइएको छ । 

चोरी भएका नगद तथा गरगहनाको मूल्य १५ लाख बढी रहेको अनुमान गरिएको छ । 

आफूसहित घरका पारिवारिक सदस्यहरू आफन्तको मरिमराउको कर्ममा गएको बखत दिउँसै चोरी भएको पीडित यादवले जानकारी दिए । 

बखरी प्रहरी चौकी भन्दा केही मिटर दक्षिणतर्फ कामत चोकमा रहेको यादवको घरमा चोरहरूले घरको पछाडिको ढोका फोडी भित्र प्रवेश गरेर घरमै रहेको हथौडी र पेचकश लगायतका औजार प्रयोग गरी चोरी गरेको देखिएको छ । 

बिहान आफन्तको घर गएका पारिवारिक सदस्य साँझ घर फर्कदा चोरी भएको पत्ता लागेको थियो । 

पीडित परिवारले चोरी घटनाको बिषयमा बखरी प्रहरी चौकीमा जाहेरी दिएका छन् । 

चालु आर्थिक वर्षको साउन र भदौको दुई महिनामा मोरङ जिल्लामा चोरीका ६० वटा घटनाहरूको जाहेरी परेको जिल्ला प्रहरी कार्यालय मोरङका प्रवक्ता कोपिला चुँडालले बताइन् । 

सो अवधिमा ७८ जना अभियुक्तसमेत पक्राउ परेको उनले जानकारी दिइन् ।