सामुहिक बलात्कारमा तीन पक्राउ

विराटनगर : धनुषाबाट आएका तीन जनाले विराटनगरकी एक युवतीलाई जवरजस्ती करणी गरेको आरोप लागेको छ । एक नावालकसहित तीन जानलाई पक्राउ गरेर प्रहरीले कारवाही अगाडि बढाएको छ ।

प्रहरीका अनुसार धनुषाबाट ट्रकमा आएका चालक, सहचालक र सहयोगी तीन जनाले विराटनगर निवासी २५ वर्षीया युवतीलाई शनिबार राति बलात्कार गरेको आरोप छ । विराटनगर–३ बरगाछीस्थित खुला चौरमा राति साढे ११ बजे धनुषा मिथिला–११ तुल्हीका ४० वर्षीय टेकबहादुर तामाङ, २० वर्षीय बिनोद चौहान र एक नाबालकले बलात्कार गरेको प्रहरीले बताएको छ । 

प्रहरी नायव उपरीक्षक रञ्जन दाहालका अनुसार बेलुका ट्रक पार्किङ गरेपछि उनीहरु खानाका लागि बसपार्क गएका थिए । त्यहांँबाट ति युवतीसँंगै सीटी रिक्सामा बरगाछीसम्म आएका थिए ।

युवतीलाई चौरमा लगेको साढे दुई घण्टापछि उनले हल्ला गरेपछि स्थानीयले प्रहरी बोलाएका थिए । तिनै जनालाई जिल्ला अदालतबाट जबरजस्ती करणीमा पक्राउ अनुमति लिइएको प्रहरीको भनाई छ ।